بۇگىن «شىمبۇلاق» تاۋ كۋرورتى 24 شىلدەگە دەيىن ۋاقىتشا جابىلدى. دەمالىس ورنى اكىمشىلىگىنىڭ مالىمەتىنشە، بۇگىن شىمبۇلاق سانيتارلىق كۇنگە جابىلادى. سەبەبى، سەل ءجۇرىپ جاياۋ جۇرگىنشىلەر كوپىرى مەن سۋ الاتىن قۇبىر ىستەن شىققان.
"21 شىلدەدە تۇيىق-سۋ ءالپى لاگەرىنىڭ ماڭىندا كىشى الماتى وزەنىندە تابيعي اپات بولدى – سەل ءجۇرىپ، جاياۋ جۇرگىنشىلەر كوپىرى قيرادى، سۋ قابىلداعىش ىستەن شىقتى. سونىڭ سالدارىنان شىمبۇلاقتا سۋ بەرۋ توقتاتىلدى. ءبىزدىڭ ماماندار سۋ قابىلداعىش ستانسيانى لايدان تازارتۋ جۇمىستارىن قارقىنمەن جۇرگىزىپ جاتىر. قولايسىزدىقتار ءۇشىن كەشىرىم سۇرايمىز"، - دەلىنگەن حابارلامادا.
الماتى قالاسى توتەنشە جاعدايلار دەپارتامەنتىنىڭ وكىلدەرى اۋا تەمپەراتۋراسىنىڭ جوعارىلاۋىنان جانە مۇزدىقتاردىڭ ەرۋىنە بايلانىستى كىشى الماتى شاتقالىنىڭ ساعاسىنداعى سۋ دەڭگەيى كوتەرىلىپ، لاستانىپ، ىشۋگە جارامسىز كۇيگە تۇسكەنىن اتاپ ءوتتى. ءقازىر الماتى تاۋلارىندا جاعداي تۇراقتى جانە توتەنشە جاعدايلار دەپارتامەنتىنىڭ باقىلاۋىندا. مورەنا كولدەرىنىڭ تاسۋ ءقاۋپى جوق.
پىكىر قالدىرۋ