مادەنيەت جانە سپورت مينيسترلىگى 3 بۋكمەكەرلىك كەڭسەنىڭ ليسەنزياسىن سوت تارتىبىمەن جويۋ بويىنشا جۇمىس جۇرگىزىپ جاتىر، دەپ حابارلايدى Sputnik قازاقستان.
جىل باسىنان بەرى زاڭنامانى بۇزعان 5 بۋكمەكەرلىك كەڭسەنىڭ قىزمەتى توقتاتىلدى. ايتا كەتەيىك، قازاقستانداعى بۋكمەكەرلىك كەڭسەلەر سانى 2 ەسەگە قىسقاردى. 2021 جىلدىڭ باسىندا ەلدە 38 بۋكمەكەرلىك كەڭسە جۇمىس ىستەسە، بۇگىندە ولاردىڭ سانى - 16. ال ونىڭ ىشىندە ءىس جۇزىندە جۇمىس ىستەيتىندەرى - 12.
بۋكمەكەرلىك كەڭسەلەردىڭ سانىن ازايتۋ ءۇشىن مادەنيەت جانە سپورت مينيسترلىگى ءتۇسىندىرۋ جۇمىسىن جۇرگىزىپ جاتىر. ناتيجەسىندە سوڭعى 3 جىلدا بۋكمەكەرلىك كەڭسەلەر 15 ليسەنزيانى ءوز ەركىمەن تاپسىرعان.
"بۇگىنگى تاڭدا مادەنيەت جانە سپورت مينيسترلىگىنىڭ قاتىسۋىمەن ويىن بيزنەسى جانە لوتەرەيا قىزمەتى سالاسىنداعى زاڭناماعا 62 تۇزەتۋدى، سونداي-اق ىلەسپە نورماتيۆتىك-قۇقىقتىق اكتىلەردى كوزدەيتىن 3 زاڭ جوباسى ازىرلەندى. سونداي-اق، ءبىز ويىن بيزنەسىنىڭ جارناماسىمەن كۇرەسۋ ءۇشىن زاڭنامالىق دەڭگەيدە تۇزەتۋلەرگە باستاماشى بولامىز"، - دەدى مادەنيەت جانە سپورت ۆيسە-مينيسترى ەرجان ەركىنبايەۆ.
پىكىر قالدىرۋ