قىرعىزستاننىڭ مەملەكەتتىك ءتىل تۋرالى زاڭىن رەسەي ءسىم "دەموكراتياعا ساي ەمەس" دەپ باعالادى. بۇل تۋرالى رەسەي ءسىم سايتىنا سىلتىمە جاساپ، ازاتتىق راديوسى حابارلادى.

"ءقازىر تمد كەڭىستىگىندە كۇردەلى جاعدايلار بولىپ جاتىر. بىرنەشە اي بۇرىن قىرعىزستاندا زاڭ قابىلداندى. بۇل يدەيا پايدا بولعان ساتتە-اق ءبىز قىرعىز دوستارىمىزعا "قىرعىز ءتىلىن جاپپاي مىندەتتەۋ - دەموكراتياعا ساي ەمەستىگىن" ەسكەرتكەنبىز. مەملەكەتتىك قىزمەت ساناتىنا مۇعالىمدەر مەن مەملەكەتتىك مەديسينالىق مەكەمەلەردە جۇمىس ىستەيتىن دارىگەرلەر دە كىرگەن. جۇمىستى جالعاستىرامىز. قىرعىز كونستيتۋسياسىندا ورىس ءتىلى ۇلت ارالىق قاتىناس ءتىلى ەكەنى بىرنەشە رەت ەسكەرتىلسە دە باسقا جاققا تارتىپ وتىر" دەدى رەسەي سىرتقى ىستەر ءمينيسترى سەرگەي لاۆروۆ.

ەسكە سالا كەتەيىك، 17 شىلدەدە قىرعىزستان پرەزيدەنتى سادىر جاپاروۆ ءتىل تۋرالى زاڭعا قول قويعان. زاڭعا سايكەس ەندى مەملەكەتتىك قىزمەتكەرلەر، دەپۋتاتتار، ۇلتتىق بانك قىزمەتكەرلەرى، كۇش قۇرىلىمدارى، سوت، پروكۋراتۋرا، ادۆوكاتتار، نوتاريۋستار، وقۋ ورىندارىنىڭ قىزمەتكەرلەرى، مەديسينا قىزمەتكەرلەرى مەملەكەتتىك ءتىل – قىرعىز ءتىلىن بىلۋگە جانە قىزمەت مىندەتىن ورىنداۋ كەزىندە پايدالانۋعا ءتيىس.

بۇل زاڭ مەنشىك تۇرىنە قاراماستان تەلەراديوكومپانيالاردى باعدارلامانىڭ كەمى 60 پايىزىن قىرعىز تىلىندە جۇرگىزۋگە مىندەتتەيدى. بىرلەسكەن كومپانيالار مەن شەتەلدىك كومپانيالار اتاۋى قىرعىز تىلىندەگى ترانسليتەراسيامەن جازىلۋعا ءتيىس.

زاڭدا ورىس ءتىلى قىرعىزستاندا رەسمي ءتىل رەتىندە قولدانىلاتىنى كورسەتىلگەن.