قىتايمەن شەكاراداعى بۇرىنعى اۋدانداردىڭ مارتەبەسى قايتارىلماق. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ مالىمدەدى.
ونىڭ ايتۋىنشا، شەكارا ماڭىنداعى اۋدانداردىڭ ينفراقۇرىلىمىن دامىتۋ قولدانىستاعى مەملەكەتتىك باعدارلامالار اياسىندا ىسكە اسىپ جاتىر.
ماسەلەن، 2019-2022 جىلدارى «اۋىل – ەل بەسىگى» باعدارلاماسى بويىنشا شەكارالىق اۋىلدا 1،5 مىڭ جوبا ىسكە اسىرىلعان. بيىل 134 اۋىلدا 300-گە جۋىق جوبا ناتيجە بەردى. سونداي-اق ۆەدومستۆو باسشىسى شەكارالىق اۋىلدارعا ساپالى ينتەرنەت ورناتۋ ماسەلەسىنىڭ دە قارالىپ جاتقانىن ايتتى.
"ءتۋريزمدى، ترانسشەكارالىق ءتۋريزمدى دامىتۋ ءۇشىن قازىرگى تاڭدا ءتيىستى جول كارتاسى ازىرلەنۋدە. شەكارالىق اۋداندار دەگەندە اسىرەسە قىتايمەن شەكتەسىپ جاتقان كەيبىر اۋماقتارداعى بۇرىنعى اۋدانداردىڭ مارتەبەسىن قالپىنا كەلتىرۋ ماسەلەسى قاراستىرىلىپ جاتىر"، - ۇلتتىق ەكونوميكا ءمينيسترى الىبەك قۋانتىروۆ.
پىكىر قالدىرۋ