اقتوبە قالاسىندا ءوز ۇلىن جاۋىزدىقپەن ولتىرگەنى ءۇشىن ايىپتالعان ارتۋر احۋنوۆ ەشكىم كۇتپەگەن مالىمدەمە جاسادى، دەپ حابارلايدى Sputnik قازاقستان كتك ارناسىنا سىلتەمە جاساپ.
سوت وتىرىسىندا احۋنوۆ بالانى ولتىرگەن ۇشەمنىڭ سىڭارى دەگەن مالىمدەمە جاسادى. ونىڭ سوزىنە قاراعاندا، بالالار ويناپ جۇرگەندە جازاتايىم وقيعا بولعان.
"ول قىزىممەن ويناعاندى وتە جاقسى كورەتىن. ولار ويناپ ءجۇرىپ، ونىڭ قولىن جىبەرىپ قالعاندا بەتونعا باسپەن ءتۇستى. ارتىنشا ۇلكەن ۇلىم تۇسىنبەي يتەرىپ جىبەردى. سول ساتتە، ول بەتىن ەدەنگە سوقتى"، - دەيدى سوتتالۋشى.
41 جاستاعى اكە ءار وتىرىستا ءتۇرلى ءۋاجدى العا تارتتى. ايىپتالۋشى ءوز كىناسىن مويىنداماي وتىر. الايدا سوتتا نە سەبەپتى جەدەل جاردەم شاقىرماعانىن دا ءتۇسىندىرىپ بەرە المادى.
تەرگەۋ كەزىندە بالانىڭ ءمايىتى جالدامالى پاتەردىڭ بالكونىندا ون كۇننەن استام ۋاقىت جاتقانى انىقتالدى. ارتىنشا اكەسى 4 جاسار دانيلدىڭ دەنەسىن جۇڭگو سومكەسىنە سالىپ، تاكسيمەن الدىن الا قازىلعان شۇڭقىرعا اپارىپ كومگەن.
سوت ساراپتاماسىنا سايكەس، بالا باسىنان اۋىر سوققى العاننان قايتىس بولدى.
"سول جاق ماڭداي بولىگىنىڭ زيگوماتيكالىق ايماعىندا سوققى بولعان. سودان كەيىن وڭ جاقتا جەلكە جاعىناندا سوققىنىڭ ءىزى بار. بۇل تىكەلەي سوققى بولۋى مۇمكىن. سىنىق جاراقاتتارى دا انىقتالدى"، - دەيدى سوت ساراپشىسى ىرىسكەلدى سۇلەيمەنوۆ.
