2028 جىلعا قاراي ەلىمىزدە 3 گاز وڭدەۋ زاۋىتى سالىنادى. بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان.
"قازىرگى ۋاقىتتا قاشاعان كەن ورنىندا قۋاتى 1 ملرد تەكشە مەتر بولاتىن گاز وڭدەۋ زاۋىتىنىڭ قۇرىلىسى جۇرگىزىلىپ جاتىر. پايدالانۋعا بەرۋ مەرزىمى – 2025 جىل"، - دەپ اتاپ وتەدى ۇكىمەت باسشىسى جاۋابىندا.
ايتۋىنشا، بۇعان قوسا قاشاعان كەن ورنىنىڭ بازاسىندا قاشاعان جوباسىنىڭ اكسيونەرىمەن جانە وپەراتورىمەن (NCOC) قۋاتى 4 ملرد تەكشە مەتر بولاتىن گاز وڭدەۋ زاۋىتى قۇرىلىسىنىڭ جوباسى جۇزەگە اسىرىلۋدا. زاۋىت 2028 جىلى ىسكە قوسىلادى.
"مۇنان بولەك، «قاراشىعاناق پەترولەۋم وپەرەيتينگ ب.ۆ.» «PSA» ج ش س وكىلەتتى ورگانىمەن بىرگە 2028 جىلى قۋاتى 4 ملرد تەكشە مەتردى قۇرايتىن گاز وڭدەۋ زاۋىتى بار گاز ستراتەگياسىن جۇزەگە اسىرۋ جول كارتاسىن ازىرلەدى"، - دەدى پرەمەر-مينيستر.
پىكىر قالدىرۋ