ۋكراينا پرەزيدەنتى ۆلاديمير زەلەنسكيي بيىل كۇزدە بەيبىت سامميت وتكىزۋدى ۇسىندى. ول ساۋد ارابيادا وسى اپتادا وتەتىن كەلىسسوزدەر ءسامميتتىڭ العاشقى باسپالداعى ەكەنىن دە اتاپ ءوتتى.
ۋكراينا پرەزيدەنتىنىڭ ۆەب-سايتىندا جاريالانعان دەرەكتەرگە سۇيەنسەك، 5 جانە 6 تامىزدا دجيدداداعى كەزدەسۋدە 40-قا جۋىق ەل قاتىسادى.
"ءبىز بەيبىت ءسامميتىڭ بيىل كۇزدە ءوتۋى ءۇشىن قولىمىزدان كەلگەنىن جاساۋدامىز. كۇز مەزگىلى دە تاياپ قالدى. الايدا سامميت وتكىزۋگە جانە كوپتەگەن ەلدەردىڭ قاتىسۋى ءۇشىن ءبىراز ۋاقىت كەرەك"، دەلىنگەن زەلەنسكييدىڭ مالىمدەمەسىندە.
ءسامميتتىڭ كۇن ءتارتىبى وتكەن جىلدىڭ كۇزىندە كييەۆ ازىرلەگەن 10 تارماقتان تۇراتىن جوسپارعا نەگىزدەلەدى. وندا كورسەتىلگەن بەيبىتشىلىك تۇجىرىمداماسى ۋكراينانىڭ اۋماقتىق تۇتاستىعىن تولىق قالپىنا كەلتىرۋدى جانە رەسەي اسكەرلەرىن تولىق شىعارۋدى، ازىق-تۇلىك پەن ەنەرگەتيكالىق قاۋىپسىزدىكتى، يادرولىق قاۋىپسىزدىكتى قامتاماسىز ەتۋدى، بارلىق تۇتقىنداردى بوساتۋدى جانە باسقا دا پۋنكتتەردى قاراستىرادى.
پىكىر قالدىرۋ