“ارسەلورميتتال تەمىرتاۋ” كومپانياسىنىڭ كومىر دەپارتامەنتىنە قاراستى "قازاقستان" شاحتاسىنداعى اپات كەزىندە زارداپ شەككەندەر سانى 13 ادامعا جەتتى. بۇدان بولەك "ارسەلور-ميتتال تەمىرتاۋ" تاۋ-كەن سەگمەنتى اتقارۋشى ديرەكتورىنىڭ ورىنباسارى سەرگەي وگاي ەكىنشى جۇمىسشىنىڭ دەنەسى تابىلعانىن حابارلادى. 

قازىرگى مالىمەت بويىنشا، اۋرۋحانادا جاتقان ەكى شاحتەر جان ساقتاۋ بولىمىنەن توكسيكولوگيا بولىمىنە اۋىستىرىلعان.

"وسى 17 تامىزىندا «پروفەسسور ح.ج. ماقاجانوۆ اتىنداعى كوپبەيىندى اۋرۋحاناسىنا» 9 شاحتەر جەتكىزىلدى. ولاردىڭ ەكەۋى رەانيماسيادان توكسيكولوگيا بولىمىنە اۋىستىرىلدى. جاعدايلارى اۋىرلاۋ. پاسيەنتتەر سانالى. اۋىرلىعى جەدەل ينتوكسيكاسيا سيندرومى مەن ەنسەفالوپاتياعا، گەموديناميكانىڭ تۇراقسىزدىعىنا، ۋلانۋدىڭ توكسيكوگەندىك كەزەڭىنە بايلانىستى. گەموديناميكالىق كورسەتكىشتەر تۇراقتى"، - دەلىنگەن حابارلامادا.

قالعان 7 ادام توكسيكولوگيا بولىمىندە. ولاردىڭ جاعدايى – ورتاشا اۋىر. اۋىرلىعى جەدەل ينتوكسيكاسيا سيندرومى مەن ەنسەفالوپاتياعا بايلانىستى. گەموديناميكالىق كورسەتكىشتەر تۇراقتى.

ەسكە سالايىق، بۇعان دەيىن ارسەلورميتتال تەمىرتاۋ كومىر دەپارتامەنتىنىڭ "قازاقستان" شاحتاسىنداعى ءورت سالدارىنان ەكى قىزمەتكەر ءولى تابىلعانى حابارلانعان بولاتىن. ءبىراق كەيىنىرەك تەك ءبىر ادامنىڭ ءولىمى راستالعانى ايتىلدى. ول - كومپانيا قىزمەتكەرى، 1965 جىلى تۋعان ۆيتاليي ۆلاديميروۆيچ سليۋنكوۆ (جەراستى ەلەكترشەبەرى، 5-رازرياد، ەڭبەك ءوتىلى 39 جىل).