17 تامىزدا وتكەن سوت وتىرىسىندا جامبىل وبلىستىق اپەللياسيالىق سوتى تارازدا قاندى قاڭتاردا «ۇقك پودپولكوۆنيگى داستان ءادىلبايدى ءولتىردى»، «قارۋ-جاراق ۇرلادى جانە ساقتادى» دەپ ايىپتالىپ، 16 جىلعا سوتتالعان ەربول جۇمانوۆتىڭ اپەللياسيالىق شاعىمى بويىنشا قاۋلى وقىدى. سوت القاسىنىڭ ءتوراعاسى نۇرمۇحاممات ابيدوۆ ءبىرىنشى ساتىلى سوتتىڭ ۇكىمىن وزگەرىسسىز قالدىردى. 

ەربول جۇمانوۆ پەن ونىڭ قورعاۋ تاراپى سوت قاۋلىسىنا نارازىلىق ءبىلدىرىپ، الداعى ۋاقىتتا جوعارى سوتقا كاسساسيالىق شاعىم تۇسىرەتىندەرىن مالىمدەدى. قاۋلى وقىلعاندا ايداۋىل ەربول جۇمانوۆتى قورعاۋشىلارىنان الشاق، زالدىڭ ەسىككە جاقىن بولىگىندە ورنالاسقان تورعا وتىرعىزدى. بۇعان دەيىنگى سوت پروسەستەرىنىڭ بارلىعىندا ول جۋرناليستەرگە جاقىن جەردە وتىرعىزىلىپ كەلگەن. ايداۋىل سوت قاۋلىسى وقىلىپ بىتكەن تۇستا، ونى سوڭىنا دەيىن سويلەتپەي، زالدان الىپ كەتتى.

سوت القاسى نۇراحان ماحاتوۆ، ايبول ساعىنتاي، جاقسىلىق ابدۋللايەۆتىڭ ءبىرىنشى ساتىلى سوت شىعارعان ۇكىمدەرىن بۇزىپ، ءارقايسىسىن 4 جىلعا باس بوستاندىعىنان ايىردى (ءبىرىنشى ساتىداعى سوت 5 جىلعا سوتتاعان). پروسەسس اياقتالعاننان كەيىن ادۆوكاتتار زالدان شىعىپ بارا جاتىپ، سوتتالۋشىلاردىڭ تۋىستارىنا باسۋ ايتىپ، ءۇش ايدان كەيىن مەرزىمىنەن بۇرىن بوساپ شىعۋعا مۇمكىندىكتەرى بار ەكەنىن ايتىپ جاتتى.

تۇسكە دەيىنگى سوت وتىرىسىندا ەربول جۇمانوۆتىڭ قورعاۋ تاراپى سوت القاسىنا سەنىمسىزدىك بىلدىرگەن. ەربول جۇمانوۆتىڭ قوعامدىق قورعاۋشىسى ەرجان جۇمانوۆ وسى ۋاقىتقا دەيىن 16 ءوتىنىشحات تۇسىرگەندەرىن، ونىڭ 12ء-ى قاناعاتتاندىرىلماعانىن ايتتى. ءبىراق ونى وزگە سوتتالۋشىلار مەن ولاردىڭ قورعاۋشىلارى قولدامادى. سوت القاسى وسىنى العا تارتىپ، ءوتىنىشحاتتى قاناعاتتاندىرمادى. پروسەستى باسىنان اياعىنا دەيىن زالدىڭ ارتقى بولىگىندە ارنايى جاساق باقىلاپ وتىردى. عيمارات سىرتىندا جەدەل جاردەم، ءورت ءسوندىرۋ قىزمەتىنىڭ كولىكتەرى تۇردى.

پروكۋرور ساياحات باعدات ۇلى قورىتىندى سوزىندە ەربول جۇمانوۆتىڭ راقىمشىلىق زاڭىن پايدالانىپ، جازاسىن وتەۋ مەرزىمىن قاتاڭ رەجيمنەن قاۋىپسىزدىگى ورتاشا مەكەمەگە اۋىستىرۋدى سۇرادى. ول بۇعان دەيىنگى ايىپتاۋ اكتىسىندە جۇمانوۆتىڭ 16 جىل جازاسىن وزگەرىسسىز قالدىرۋدى سۇراعان. قاندى قاڭتار كەزىندە ءبىرىنشى ساتىلى سوت ەربول جۇمانوۆتى ق ر قك 291-بابىنىڭ 3-بولىگى 4-تارماعى، 24-بابىنىڭ 3-بولىگى، 287-بابىنىڭ 4-بولىگى، 380-1-بابىنىڭ 2-بولىگى 2،10-تارماقتارىمەن كىنالى دەپ تانىلىپ، 16 جىلعا باس بوستاندىعىنان ايىرعان.

ەربول جۇمانوۆتان بولەك، بۇل ءىس بويىنشا تاعى 8 ادامعا ۇكىم شىققان. 28 ساۋىردە سۋديا قادىربەك نۇرجان نۇراحان ماحاتوۆ 6 جىلعا، ايبول ساعىنتاي مەن جاقسىلىق ابدۋللايەۆتى 5 جىلعا باس بوستاندىعىنان ايىرۋ جازاسىنا كەسىپ، قانات نۇراحان ۇلى، ەرماحان سايلاۋوۆ، داۋرەن نۇرالييەۆ، دوسمۇحاممەت سادىقوۆ جانە سالامات قوسانوۆتى راقىمشىلىق زاڭىن پايدالانىپ، سوت زالىنان بوساتقان. 

دەرەككوز: The Qazaq Times