رەسەي پرەزيدەنتى ۆلاديمير پۋتين "ۆاگنەر" اسكەري جاساعىنىڭ نەگىزىن قالاۋشى پريگوجيننىڭ ولىمىنە قاتىستى پىكىر ءبىلدىردى. بۇل تۋرالى ول دونەسك رەسپۋبليكاسىنىڭ باسشىسى دەنيس پۋشيلينمەن كەزدەسۋ كەزىندە ايتتى.
"ەڭ الدىمەن ۇشاق اپاتىنان قازا تاپقانداردىڭ وتباسىنا شىن نيەتپەن كوڭىل ايتقىم كەلەدى. قازا تاپقاندار ۋكرايناداعى نەو-ناسيستىك رەجيممەن كۇرەسكە ايتارلىقتاي ۇلەس قوستى. ءبىز مۇنى ءاردايىم ەستە ساقتايمىز، جاقسى بىلەمىز ءارى ەشقاشان ۇمىتپايمىز"، دەدى پۋتين.
بۇدان بولەك پۋتين پريگوجينگە قاتىستى دا بىرەر اۋىز پىكىر ءبىلدىردى.
"پريگوجيندى مەن بۇرىننان تانيمىن. 1990 جىلداردان بەرى تانىسپىز. پريگوجيننىڭ تاعدىرى اۋىر ازامات ەدى. ءيا، ومىرىندە تالاي قاتەلىك جاسادى. ءوزىنىڭ ويلاعان ناتيجەلەرىنە قول جەتكىزدى. سونداي-اق مەنىڭ وتىنىشىممەن جاسالعان ورتاق ىسىمىزدە دە جاقسى ناتيجە كورسەتتى. ول تالانتتى ازامات، تالانتتى كاسىپكەر"، دەيدى رەسەي پرەزيدەنتى.
پۋتين پريگوجيننىڭ تەك رەسەيدە عانا ەمەس افريكا ەلدەرىندە دە جۇمىس ىستەگەنىن ەسكە الدى. شەتەلدە كاسىپكەر مۇناي، گاز، قىمبات مەتالدارمەن اينالىسقان ايتتى. پرەزيدەنتىڭ ايتۋىنشا، افريكادان كەلگەن پريگوجين رەسەيدە بىرنەشە تۇلعامەن كەزدەسكەن.
"بۇل تۋرالى ماعان بۇگىن تاڭەرتەڭ تەرگەۋ كوميتەتىنىڭ باسشىسى باياندادى. وقيعاعا قاتىستى الدىن الا تەرگەۋ جۇمىستارى باستالدى. تەرگەۋ جۇمىستارىنىڭ تولىق جۇرگىزىلىپ، سوڭىنا دەيىن جەتەتىنىنە ەش كۇمان بولماسىن"، دەپ ءسوزىن اياقتادى پۋتين.
پىكىر قالدىرۋ