الماتى وبلىسى پوليسيا دەپارتامەنتىنىڭ بۇرىنعى باسشىسى، 10 جىلعا باس بوستاندىعىنان ايىرىلعان سەرىك كۇدەبايەۆتىڭ وسكەمەن تۇرمەسىندەگى سۋرەتى الەۋمەتتىك جەلىگە تاراپ كەتۋىنە بايلانىستى قىزمەتتىك تەكسەرۋ جۇرگىزىلەدى.
بۇل تۋرالى قىلمىستىق اتقارۋ جۇيەسى كوميتەتىنىڭ باسپا ءسوز قىزمەتى حابارلادى. ءقازىر سوتتالعانداردىڭ ۇيالى تەلەفون پايدالانۋى، بەينەباقىلاۋ كامەراسىنىڭ وبەكتيۆىن جابۋىنا قاتىستى قىزمەتتىك تەرگەۋ تاعايىندالعان.
"ءىىم بۇيرىعىمەن بەكىتىلگەن ىشكى ءتارتىپ ەرەجەلەرى بويىنشا قىلمىستىق اتقارۋ جۇيەسىندە قاماۋدا وتىرعان سوتتالۋشىلار ازىق-تۇلىكتى سىرتتان سالەمدەمە رەتىندە نەمەسە تۋىسقاندارىمەن كەزدەسكەن كەزدە قابىلداۋعا حاقىلى. بۇل تالاپ قىلمىستىق اتقارۋ جۇيەسىندەگى مەكەمەلەردىڭ بارلىعىنا ورتاق. الدىن الا مالىمەت بويىنشا، شىعىس قازاقستان وبلىستىق قىلمىستىق اتقارۋ جۇيەسى دەپارتامەنتىنىڭ №22 مەكەمەسىندە سوتتالعاندار تۋىسقاندارىنان دايىن تاماق قابىلداپ العان. تەكسەرۋ كەزىندە تىيىم سالىنعان ازىق-تۇلىك ونىمدەرى تابىلعان جوق. قازىرگى تاڭدا سوتتالعانداردىڭ ۇيالى تەلەفون قولدانۋى جانە بەينەباقىلاۋ كامەراسىنىڭ وبەكتيۆىن جاۋىپ تاستاۋ فاكتىسى بويىنشا قىزمەتتىك تەرگەۋ تاعايىندالدى. زاڭ بۇزىلعان جاعدايدا قولدانىستاعى زاڭناما اياسىندا شارا قولدانىلادى"، - دەلىنگەن رەسمي حابارلامادا.
پىكىر قالدىرۋ