وتكەن سەنبى كۇنى الماتىداعى اربات الاڭىندا كىتاپ جارمەڭكەسى ءوتتى. كىتاپسۇيەر قاۋىم بەلدى باسپالاردىڭ كىتاپتارىن ارزان باعادا ساتىپ الىپ، سۇيىكتى اۆتورلارىمەن كەزدەسۋ مۇمكىندىگىن يەلەندى. داستۇرگە اينالعان «KitapFest» فەستيۆالىندە يلليۋستراسيالىق كورمەلەر، قازاقستاندىق جازۋشىلار مەن پىكىر يەلەرىمەن كەزدەسۋ جانە شەبەرلىك ساعاتى مەن بايقاۋلار بولدى.

ءىس-شارا بارىسىندا كوپتەگەن كىتاپتاردىڭ تانىستىرىلىمى ءوتتى. سولاردىڭ ەڭ اۋقىمدىسى – «اتامۇرا» باسپاسىنان جارىق كورگەن 17 كىتاپتىڭ تۇساۋكەسەرى. وعان مەملەكەتتىك سىيلىقتىڭ يەگەرى، بەلگىلى جازۋشى، باسپاگەر كادىربەك سەگىزباي ۇلى، جازۋشى، ساتيريك ەرماحان شايحى، م.اۋەزوۆ اتىنداعى ادەبيەت جانە ونەر ينستيتۋتى ديرەكتورىنىڭ ورىنباسارى، شىعىستانۋشى، زەرتتەۋشى تورەالى قىدىر سياقتى زيالى قاۋىم مەن ب ا ق وكىلدەرى، ۇلت جاناشىرلارى قاتىستى.

ءسوز باسىن العان “اتامۇرا” كورپوراسياسىنىڭ پرەزيدەنتى راقىمعالي ابرار ۇلى شىعارىلىپ جاتقان كىتاپتار ابايدان باستاپ بۇگىنگى ءتىرى كلاسسيكتەردىڭ ەڭبەگىن باسىپ جاتقانىن ايتىپ، باسپانىڭ باستى جۇمىستارىن، باعىت-باعدارىن تىلگە تيەك ەتتى.

"جاڭا وقۋ جىلىنىڭ قارساڭىندا داستۇرگە اينالعان جاڭا كىتاپتاردىڭ جارىققا شىعارۋدى ءجون سانادىق. مۇندا قازاقتىڭ ماقال-ماتەلدەرى مەن جۇمباقتارى باتىرلىق جىر-داستاندار، ليرو-ەپوستىق جىرلار، شەشەندىك سوزدەر مەن اڭىز، ەرتەگىلەر جيناقتالعان. بىلەسىزدەر، ءبىر عانا ماقالدىڭ ءوزىنىڭ بىرنەشە نۇسقاسى بولۋى مۇمكىن. سول ءۇشىن ادەبيەت جانە ونەر ينستيتۋتى عالىمدارىنىڭ سۇزگىسىنەن وتكىزدىك" – دەگەن راقىمعالي ابرار ۇلى كومەك بەرگەن ينستيتۋتقا العىس ايتتى.

م.اۋەزوۆ اتىنداعى ادەبيەت جانە ونەر ينستيۋتى ديرەكتورىنىڭ ورىنباسارى تورەالى قىدىر شىعارىلعان كىتاپتاردىڭ تۇر-تۇسىنە ەرەكشە توقتالدى.

– "سارى ءتۇس – بايلىقتىڭ، شەكسىز رۋحاني ماحابباتىڭ بەلگىسى. كىتاپتىڭ سىرتقى ءتۇرى مەن ىشكى مازمۇنى سايكەس كەلەدى. ءبىز تۇركى حالىقتارىنىڭ ىشىندەگى اۋىز ادەبيەتكە ەڭ باي حالىقپىز. 100 تومدىق بابالار ءسوزىن شىعارعانبىز. بۇدان بولەك ينستيتۋت قورىندا 40 مىڭعا جۋىق قولجازبا ساقتاۋلى تۇر. وسىدان تاعى دا 100 توم شىعارۋعا بولادى» – دەدى تورەالى قادىر. 

ەلىمىزدەگى ەڭ اۋقىمدى "اتامۇرا" باسپاسىنان بولەك ەندى قادامداپ جولىن باستاپ، از ۋاقىت ىشىندە ايتۋلى جەتىستەرگە جەتىپ ۇلگەرگەن باسپالار دا بار. سولاردىڭ ءبىرى – "مازمۇنداما" باسپا ءۇيى. جارمەڭكە قاتىسۋشىلارىنان دا پىكىر سۇراپ، اقپارات الدىق.

"مازمۇنداما" باسپاسىنىڭ شىعارۋشى رەداكتورلارىنىڭ ءبىرى قانىماي بايدەتوۆا جارمەڭكەگە جانە باسپا ءۇيىنىڭ ەرەكشەلىكتەرىنە توقتالدى: 

– "باسپانىڭ ەرەكشەلىگى – تۇڭعىش رەت سامماري، non-fiction جانە الەمدىك بەستسەللەر كىتاپتاردى قازاق تىلىنە اۋدارما جاسالادى. قۇرىلعانىنا از عانا ۋاقىت وتسە دە، 200-دەن استام كىتاپ جارىق كورىپ، وقىرمانداردىڭ سۇيىسپەنشىلىگىنە بولەنۋدە. وسى كىتاپتاردىڭ ىشىندە ەرەكشە ورىن الاتىنى – اۋدارما بەستسەللەرلەر جانە قازاق كوركەم ادەبيەتى. سونداي-اق "بالالارعا بازارلىق" اتتى جاڭا سەريا قولعا الىنىپ، ءبىراز كىتاپ تامىز ايىندا جارىق كوردى.

بۇگىنگى جارمەڭكەدە "مازمۇنداما" وقىرماندارىنىڭ سانى كوبەيىپ جاتقانى ايقىن سەزىلدى. كىتاپقا سۇرانىس جوعارى. اسىرەسە جاستاردىڭ قىزىعۋشىلىعى ەرەكشە ەكەنى بايقالادى. كوپ ساتىلعان كىتاپتار دەگەندە، نەگىزى، ولاردى ءبولىپ-جارۋعا كەلمەيدى. بارلىق جانرداعى كىتاپتار تەڭدەي ساتىلدى. ءبىراق ەرەكشە سۇرانىسقا يە كىتاپتاردىڭ قاتارىنا "مەملەكەتتەر نەگە دامىماي قالادى"، "الحيميك"، "اتوم ادەتتەر"، "پارفيۋمەر"، "پىكىرتالاس ونەرى"، "ستيۆ دجوبس" جانە بالالارعا ارنالعان كىتاپتاردى اتاپ وتسە بولادى".

سۇرانىسقا كوپ يە بولعان كىتاپتاردىڭ ءبىرى – "تارماقتار". كىتاپتىڭ اۆتورى رىسگۇل دوسجانوۆا ەرەكشە فورماتتاعى جيناقتى شىعارۋ يدەياسى قالاي كەلگەنىن، ەكىنشى باسىلىمىڭ وزگەشىلىگى جايىندا ايتىپ بەردى: 

– جالپى، تارماقتار دەگەن اتاۋدىڭ ءوزى الەۋمەتتىك جەلىدەگى كىشكەنتاي پاراقشادان باستالىپ، كىتاپقا اينالدى. سەبەبى، جەلى بەتتەرىندە ەمەس، كىتاپ بەتتەرىندە اتىمىزدىڭ قالعانىن قالادىم. سولاي ءبىرىنشى كىتاپ دۇنيەگە كەلدى. ءبىرىنشى كىتاپتى شىعاراتىن كەزدە ءبىزدىڭ قارجىلاي مۇمكىندىگىمىز بولمادى. كوپ كاسىپكەردىڭ الدىنا باردىم. "كىتاپ وقىمايتىن قوعامدا كىتاپ شىعارعانى نەسى" دەپ ءبىراز ەسىك جابىلدى. ويتكەنى، بۇل كىتاپتىڭ وزگە كىتاپتاردان قاراعاندا جۇمىسى ءارى شىعىنى دا قالتاعا ءبىراز سالماق سالادى. ءسويتىپ ءجۇرىپ، 1 جىلدىڭ ىشىندە شىعاردىق قوي. سۇرانىستىڭ كوپتىگى ءبىزدى قاتتى تاڭقالدىردى.