مادەنيەت جانە اقپارات مينيستر ايدا بالايەۆا مەكتەپتەگى حيدجاب كيۋ ماسەلەسىنە قاتىستى پىكىر ءبىلدىردى. ول ءقۇقىقتىق-نورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيتىنىن ايتتى.
«ءقازىر الەۋمەتتىك جەلىدە مەكتەپتەردە حيدجاب كيۋ ماسەلەسىنە قاتىستى تالقى توقتار ەمەس. وسىعان بايلانىستى، ءدىني سالاعا جاۋاپتى لاۋازىمدى تۇلعا رەتىندە، ءوز تاراپىمنان تۇسىنىكتەمە بەرۋدى ءجون كورىپ وتىرمىن. اتا-زاڭىمىزعا سايكەس قازاقستاندا ءدىن مەملەكەتتەن بولىنگەن. ءسوز جوق، مەملەكەت ءدىن بوستاندىعىنا كەپىلدىك بەرەدى.ءبىراق ءبىز - زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس، ازاماتتىق نورمالارمەن رەتتەلەدى»، - دەپ جازدى ايدا بالايەۆا فەيسبۋك پاراقشاسىنا.
ول ءقۇقىقتىق-نورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى دەپ وتىر.
«ويتكەنى، ءبىلىم بەرۋ ەرەكشەلىگى ءبىرىڭعايلىقتى تالاپ ەتەدى. ال كونستيتۋسيامىز بويىنشا مەكتەپتىڭ مىندەتى – ەل ازاماتتارىنا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ. سوندىقتان مەكتەپتە بالا ەڭ الدىمەن ساپالى ءبىلىم الۋى كەرەك. سودان كەيىن بارىپ، ەرجەتە كەلە ءدىني نانىم-سەنىمىن، قانداي كيىم ۇلگىسىن كيەتىنىن ءوزى شەشەدى دەپ ويلايمىن»، - دەدى مينيستر.
بۇعان دەيىن مەكتەپتەگى ورامال ماسەلەسىنە بايلانىستى ءدىني باسقارما مالىمدەمە جاساپ، مەملەكەتتىك مەكەمەلەرگە ءوتىنىش بىلدىرگەنىن حابارلاعان ەدى.
پىكىر قالدىرۋ