پرەزيدەنتتىڭ باسپا ءسوز حاتشىسى نۇرمۇحامەد بايعارايەۆ قىزمەتىنەن كەتتى. ول بۇل قىزمەتكە وتكەن اپتادا عانا تاعايىندالعان ەدى.
“كەشە دەنساۋلىعىما قاتىستى وقىس جاعدايدان سوڭ (پريستۋپتار) دارىگەرلەرگە تەكسەرىلۋگە ءماجبۇر بولدىم. تولىق تەكسەرىستەن كەيىن سىرقاتتىڭ بەلگىسى بايقالدى. دارىگەرلەر ۇزاقمەرزىمدى ەم-دومدى بىردەن باستاۋدى، ونى تۇراقتى قابىلداۋدى جانە باستىسى – ۇشاقپەن ۇشۋدى بەلگىلى ءبىر ۋاقىتقا دەيىن توقتاتۋدى تالاپ ەتتى. مەديسينالىق تالاپ قازىرگى قىزمەتىمدى تولىققاندى اتقارۋعا كەدەرگىسىن كەلتىرەتىنى بەلگىلى. سەبەبى ايماقتارعا جانە شەتەلدەرگە ءىس-ساپارلار تۇراقتى تۇردە بولادى. بۇل – ءجيى ۇشاقپەن ۇشۋ دەگەن ءسوز. شىنى كەرەك، مۇندايدى ءوزىم دە كۇتپەدىم. جوسپار باسقاشا ەدى. وتكەن اپتادا كىرىسكەن قىزمەتىمە بىلىمىممەن، بىلىكتىلىگىممەن دايىن ەدىم. باسپا ءسوز قىزمەتىن جەتىلدىرۋگە، ودان ءارى اشىق ەتۋگە قاتىستى بىرنەشە يدەيا، باستامالارىم بار ەدى”، – دەپ جازدى نۇرمۇحامەد بايعارايەۆ ءوزىنىڭ الەۋمەتتىك جەلىدەگى پاراقشاسىندا.
ەسكە سالساق، نۇرمۇحامەد بايعارايەۆ 6 قىركۇيەكتە پرەزيدەنتىڭ باسپا ءسوز حاتشىسى قىزمەتىنە تاعايىندالعان بولاتىن.
پىكىر قالدىرۋ