"توميريس" كىتابىنىڭ اۆتورى ەرجان ورىمبەتوۆ الماتى قالالىق سوتىنا شاعىم ءتۇسىردى، ول نۇرسۇلتان نازاربايەۆ پەن ونىڭ كىشى قىزى ءاليا نازاربايەۆادان اۆتورلىق قۇقىقتى بۇزعانى ءۇشىن 50 ملن تەڭگە ءوندىرىپ الۋعا نيەتتى، دەپ حابارلايدى Qamshy.kz اقپارات اگەنتتىگى Ulysmedia.kz سايتىنا سىلتەمە جاساپ.
ءوز ارىزىندا ورىمبەتوۆ 2013 جىلى "توميريس" كىتابىن جازعانىن جانە ونى فيلم ءتۇسىرۋ ءۇشىن نازاربايەۆ پەن مادەنيەت مينيسترلىگىنە ۇسىنعانىن اتاپ ءوتتى.
"نازاربايەۆ ءوزىنىڭ كومەكشىسى ارقىلى كىتاپ ءۇشىن العىسىن ءبىلدىردى، ءبىراق فيلم تۇسىرىلىمىندە قولدامادى. 2017 جىلدىڭ 10 ساۋىرىندە كەنەتتەن ءاليا نازاربايەۆانىڭ ءوزى "توميريس" ءفيلمىن ءتۇسىرىپ، پروديۋسەر جانە سەناريي اۆتورى بولاتىنى بەلگىلى بولدى. نازاربايەۆا مەن "قازاقفيلم" اق اراسىندا سەناريي ازىرلەۋگە ارنالعان شارت قوسىمشادا بار. كارتيناعا تاپسىرىس بەرۋشى ق ر مادەنيەت مينيسترلىگى بولادى. 2017 جىلعى 27 ساۋىردە پرەزيدەنت نۇرسۇلتان نازاربايەۆ رەجيسسەر اقان ساتايەۆپەن كەزدەسىپ، "توميريس” ءفيلمىنىڭ سەناريى بويىنشا ءوز ۇسىنىستارىن بەردى. سونىمەن قاتار ءفيلمدى تۇسىرۋشىلەردىڭ ەشقايسىسى مەنى شاقىرعان دا، سويلەسكەن دە جوق. ناتيجەسىندە "توميريس" ءفيلمى مەنىڭ قاتىسۋىمسىز ءتۇسىرىلدى جانە ونىڭ تۇساۋكەسەرى 2019 جىلدىڭ قىركۇيەگىندە ءوتتى. بۇل ءفيلمدى كورگەندە مەن بىردەن پلاگيات ەكەنىن ءتۇسىندىم. ءفيلمنىڭ سيۋجەتى، ونداعان كورىنىستەرى مەن ديالوگتارى مەنىڭ كەلىسىمىمسىز سوزبە-سوز مەنىڭ كىتابىمنان كوشىرىلدى. وسىدان كەيىن بىردەن ءفيلمدى ءتۇسىرۋشى مەن تاپسىرىس بەرۋشىگە اۆتورلىق قۇقىعىم بۇزىلعانى تۋرالى حاتتار جازدىم. ق ر مادەنيەت مينيسترلىگى مەن "قازاقفيلم" اق-نىڭ بىرلەسكەن جاۋابىندا كىتاپ پەن فيلمدەگى سايكەس كەلەتىن تۇستار از جانە كەزدەيسوق ەكەنى ايتىلعان"، - دەيدى اۆتور.
ول مادەنيەت مينيسترلىگىنىڭ جاۋابى شىندىققا جاناسپايتىنىن ايتتى.
"مىسالى، مەنىڭ كىتابىمداعى ەرەكشە ءسوز تىركەسى "حۆاتيت سلوۆ!” فيلمدە ءۇش رەت ايتىلادى. ال مەنىڭ شىعارمامداعى كيردىڭ ساق تايپالارىنا ارنالعان "يا سوترۋ يح س ليسا زەملي" دەگەن جەكە سويلەم فيلمدە ەكى رەت قولدانىلعان. مەنىڭ جۇمىسىمنان كوشىرىلگەن مۇنداي تىركەستەر كوپ. ولاردىڭ بارلىعى قوسىمشادا ۇسىنىلعان. سپارگاپيستىڭ ۇلى 3 جاسىندا ات ۇستىندە وتىرعاندا جانە 4 جاسىندا ساداق تارتقاندا، مەنىڭ كىتابىمنان ەرەكشە ءۇزىندى فيلمدەگى ءۇش كورىنىستە بار. مەنىڭ ەڭبەگىمنەن وسىنداي ونداعان كورىنىستەر الىنعان"، - دەپ اتاپ ءوتتى اۆتور.
ول سوتتان جاۋاپكەرلەردەن تالاپكەردىڭ پايداسىنا مورالدىق جانە ماتەريالدىق زالالدى ءوندىرىپ الۋدى سۇرايدى.
تالاپ ەتىلگەن سوما – 50 ميلليون تەڭگە.
ورىمبەتوۆ ءوز ءسوزىنىڭ شىندىق ەكەنىن دالەلدەۋ ءۇشىن نۇرسۇلتان نازاربايەۆقا جولداعان حاتتى جانە ونىڭ كومەكشىسىمەن فيلم ءتۇسىرۋ تۋرالى تەلەفون ارقىلى جۇرگىزىلگەن كەلىسسوزدى ۇسىنا الاتىنىن جەتكىزدى.
"توميريس" – رەجيسسەر اقان ساتايەۆتىڭ ساق پاتشايىمى مەن ۇلى كير تۋرالى باياندايتىن قازاقستاندىق كوركەم ءفيلمى. ءفيلمنىڭ پرەمەراسى 2019 جىلدىڭ قىركۇيەگىندە ءوتتى.
پروديۋسەرى – ءاليا نازاربايەۆا.
پىكىر قالدىرۋ