16 قىركۇيەكتە اتىراۋ وبلىسى ماقات اۋدانىندا «زارنيسا» اسكەري-سپورتتىق ويىنى باستالاردا مەملەكەتتىك گيمن ورىندالعان ەكەن. سول كەزدە العاشقى اسكەري دايىندىق ءپانىنىڭ ءمۇعالىمى وڭ قولىن جۇرەك تۇسىنا ەكى ساۋساقپەن قويىپ، ءانۇرانعا ادەپسىزدىك تانىتقان. وسىعان وراي، مەملەكەتتىك رامىزدەردى ناسيحاتتاۋ جونىندەگى ۇلتتىق ورتالىق وبلىستىق ىشكى ساياسات باسقارماسى مەن اۋدان اكىمىنە ۇسىنىس جولدادى. ياعني، ءانۇرانعا قۇرمەت كورسەتپەگەن ازاماتتى ق ر اقبتك-نىڭ 458-بابى («ق ر مەملەكەتتىك تۋىن، ەلتاڭباسىن، گيمنىن پايدالانۋ جانە ورىنداۋ ءتارتiبiن بۇزۋ») 1-بولىمىنە سايكەس كىنالى دەپ تانىپ، اكىمشىلىك جاۋاپكەرشىلىككە تارتۋدى سۇراپتى. 

– «ە-وتىنىش» جۇيەسىنە تىركەلگەن شاعىم پوليسيا دەپارتامەنتىندە قارالدى. كىنالى ازامات انىقتالىپ، وعان زاڭعا سايكەس اكىمشىلىك ايپپۇل سالىندى، - دەيدى جەرگىلىكتى پوليسيا قىزمەتى باسقارماسىنىڭ باستىعى ەرلان بيعامبايەۆ.

وسىلايشا، كىنالى تۇلعا 50 ايلىق ەسەپتىك كورسەتكىش، ياعني، 172 500 تەڭگە ايىپپۇل ارقالاپ وتىر. ەگەر ونى ءبىر اپتا ىشىندە تولەپ ۇلگەرسە، تەك جارتىسىن عانا وتەيدى. ال، مەملەكەتتىك رامىزدەردى ناسيحاتتاۋ جونىندەگى ۇلتتىق ورتالىعىنىڭ ديرەكتورى رۋسلان حامزانىڭ ايتۋىنشا، وسىعان ۇقساس جاعداي وسىدان ءتورت جىل بۇرىن ورىن العان ەكەن.

– اتىراۋ قالاسىنداعى «شاپاعات» دەسترۋكتيۆتىك ءدىني اعىمداردان جاپا شەككەندەرگە كومەك كورسەتۋ ورتالىعىنىڭ ۇيىمداستىرۋىمەن ءدىني بىرلەستىكتەر اراسىندا شاعىن فۋتبولدان اشىق تۋرنير وتكەن بولاتىن. جارىستىڭ باسىندا ق ر ءانۇرانى ورىندالعان ساتتە وڭ قولىن جۇرەك تۇسىنا قويماعان، ياعني، مەملەكەتتىك رامىزگە قۇرمەت كورسەتپەگەن ەلىمىزدىڭ ەكى ازاماتى ق ر اقبتك-نىڭ 458-بابى 1-بولىمىنە سايكەس كىنالى دەپ تانىلدى. ولارعا قاتىستى اكىمشىلىك قۇقىقبۇزۋشىلىق تۋرالى حاتتاما تولتىرىلىپ، ايىپپۇل سالىندى، - دەيدى ول.

ايتا كەتەيىك، «مەنىڭ قازاقستانىم» 2006 جىلى 6 قاڭتاردا رەسمي تۇردە پارلامەنتتە تالقىلانىپ، مەملەكەتتىك گيمن بولىپ بەكىتىلدى. ونىڭ ماتىنىنە تۇڭعىش پرەزيدەنت تاراپىنان قوسىمشا وزگەرىستەر ەنگىزىلگەنىن كوپشىلىك جاقسى بىلەدى. ءانۇران ايتىلعاندا جۇرتشىلىق ورىندارىنان تۇرىپ، وڭ قولىن سول جاق كەۋدەسىنە – جۇرەك تۇسىنا قويادى.