قالا اكىمى ۇزدىكسىز جىلۋمەن جابدىقتاۋ ءۇشىن يۋجنايا قازاندىعىن رەكونسترۋكسيالاۋدى اياقتاۋدى تاپسىردى

الماتى اكىمى ەربولات دوسايەۆ جۇمىس ساپارى اياسىندا بوستاندىق اۋدانىنداعى يۋجنايا قازاندىعىنىڭ رەكونسترۋكسيالاۋ نىسانىمەن تانىستى، سونىمەن قاتار، بوستاندىق اۋدانىنىڭ تۇرعىندارىن ەلەكتر قۋاتىمەن قامتاماسىز ەتەتىن «الماگۇل» قوسالقى ستانسياسىنا باردى.  باستى ماقسات – ينجەنەرلىك ينفراقۇرىلىم نىساندارىنىڭ الداعى جىلىتۋ ماۋسىمىنا دايىندىعىن تەكسەرۋ، دەپ حابارلايدى almaty-akshamy.kz

العاشقى نىساندا مەگاپوليس باسشىسى الماتى قالاسىنداعى يۋجنايا اۋداندىق قازاندىعىنىڭ قايتا جاڭارتۋ بارىسىن تەكسەردى. جوبا اياسىندا 3 ەسكى سۋ جىلىتاتىن قازاندىق جاڭالانىپ، 1 قازاندىق كۇردەلى جوندەۋدەن وتەدى.

قالالىق ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆ اكىمگە ءقازىر بارلىق تەحنولوگيالىق جۇمىس اياقتالعانىن، گاز قۇبىرلارىن، ءتۇتىن مۇرجالارىن وقشاۋلاۋدى، مازۋت ساقتاۋ رەزەرۆۋارلارىن قورشاۋدى، مونتاجداۋدى، سونىمەن بىرگە ىرگەلەس اۋماقتى اباتتاندىرۋدىڭ، ىسكە قوسۋ-رەتتەۋ جۇمىستارىنىڭ جالعاسىپ جاتقانىن ايتتى.

ەربولات دوسايەۆ ەنەرگەتيكا جانە سۋمەن جابدىقتاۋ باسقارماسى باسشىلىعىنىڭ نازارىن مەردىگەر ۇيىمنىڭ جۇمىستاردى اياقتاۋدىڭ بۇرىن بۇزىلعان مەرزىمىنە اۋدارىپ، بيىل 1 قازاننان كەشىكتىرمەي نىساننىڭ 100% دايىن بولۋىن قامتاماسىز ەتۋدى تاپسىردى.

انىقتاما: بۇعان دەيىن جوبانىڭ ۋاقىتىلى اياقتالۋىنا جول بەرمەۋ ءۇشىن اكىمدىك «سيلۋمين-ۆوستوك» ج ش س جەتكىزۋشىسى ۇسىنعان 5 سايكەس كەلمەيتىن جەلىلىك سورعىنى اۋىستىرۋ جونىندە جەدەل شارالار قابىلداعان بولاتىن، سەبەبى جەلىلىك سورعىلاردىڭ ەلەكتر قوزعالتقىشتارىنىڭ تەز قىزىپ كەتۋىنە بايلانىستى تۇيتكىلدەر تۋىندادى. ماسەلەن، 2022 جىلى اكىمدىك قازاندىقتى رەكونسترۋكسيالاۋ جونىندەگى جۇمىس جوباسى اياسىندا ورناتىلعان بەس جەلىلىك سۋ سورعىسى ءۇشىن تولەنگەن سومانى قايتارۋ ءۇشىن الماتى قالاسىنىڭ ماەس-نە تالاپ ارىز بەردى. وسىعان بايلانىستى، مەردىگەر ۇيىمنان تولەنگەن جەلىلىك سورعىلار ءۇشىن جەرگىلىكتى بيۋدجەتتىڭ كىرىسىنە جوعارىدا كورسەتىلگەن سومانى ءوندىرىپ الۋ ءۇشىن سوت پروسەسى جۇرگىزىلدى. بۇگىندە بۇل ءىس ەنەرگەتيكا جانە سۋمەن جابدىقتاۋ باسقارماسىنىڭ پايداسىنا شەشىلدى، سوت شەشىمى كۇتىلىپ وتىر.

«بوستاندىق اۋدانىندا قازاندىقتى رەكونسترۋكسيالاۋ جوباسى اياقتالىپ كەلەدى: قۋاتى 55 گكال-ساعاتقا ارتتى، 190 گكال-ساعاتقا جەتتى. بۇل قالانىڭ وڭتۇستىك بولىگىن، 200 مىڭ تۇتىنۋشىنى، سونىڭ ىشىندە ءال-فارابي داڭعىلىنان تومەن گاگارين، روزىباكييەۆ، جاروكوۆ كوشەلەرىندەگى جاڭا تۇرعىن ءۇي كەشەندەرىن ۇزدىكسىز جىلۋمەن جانە ىستىق سۋمەن قامتاماسىز ەتۋگە مۇمكىندىك بەرەدى»، - دەدى ەربولات دوسايەۆ مەردىگەر ۇيىمعا كەلەسى اپتاداعى ارالىق قورىتىندى تۋرالى بايانداۋدى تاپسىردى.

قالا اكىمى قۇرىلىس-مونتاج جۇمىستارىن ورىنداۋ ساپاسىنا قاتىستى ءبىرقاتار تاپسىرما بەردى. ەربولات دوسايەۆ بۇل ءىس تۇراقتى تۇردە باقىلانىپ تۇرۋ كەرەكتىگىن ايتتى.

الماتى اكىمىنىڭ كەلەسى ايالداعان نىسانى بيىل 1 تامىزدا پايدالانۋعا بەرىلگەن «الماگۇل» جاڭا پودستانسياسى بولدى. جاڭا نىسان 100 مۆت قۋاتقا ءارتتىى. پودستانسيانىڭ باستى مىندەتى – قازىرگى جانە جاڭادان سالىنىپ جاتقان تۇرعىن ءۇي كەشەندەرىن قوسقاندا 200 مىڭنان استام تۇتىنۋشىنى قامتۋ. قازىرگى تاڭدا كوممۋنالدىق قىزمەتتەر الماگۇل شاعىن اۋدانى، ءال-فارابي - جاروكوۆ - وتەپوۆ - روزىباكييەۆ كوشەلەرىنىڭ كۆادراتىنداعى وسى پودستانسياعا تۇرعىن ءۇي كەشەندەرىن قوسۋ بويىنشا جۇمىستاردى اياقتادى.

جاڭا پودستانسيادان تاراتۋ پۋنكتتەرىنە قۋات بەرۋ ءۇشىن ۇزىندىعى 10،2 شاقىرىم 10 كۆ كابەلدىك جەلىلەردىڭ تراسساسى سالىنعانىن اتاپ وتكەن ءجون، سونىمەن بىرگە وسى قوسالقى ستانسياعا 110 كۆ ەلەكترمەن جابدىقتاۋدىڭ 4،8 شاقىرىم كابەلدىك جەلىسىن توسەۋ اياقتالدى.

ءقازىر «اجك» سەكسيالاردا كابەلدەردى قوسۋ جانە تۇتىنۋشىلاردىڭ جۇكتەمەسىن ءبولۋ جونىندەگى ءىس-شارالاردى قولعا العان. جۇمىس كەستەگە سايكەس جۇرگىزىلەدى.

ينجەنەرلىك ينفراقۇرىلىم نىساندارىن ارالاۋ قورىتىندىسى بويىنشا الماتى اكىمى قالانىڭ الداعى جىلىتۋ ماۋسىمىنا دايىندىعى ماسەلەسى ەرەكشە باقىلاۋدا ەكەنىن اتادى. كوممۋنالدىق كاسىپورىنداردىڭ وكىلدەرى بارلىق جۇمىستى بەكىتىلگەن كەستەگە سايكەس اياقتاۋعا ءتيىس.