5 قازاندا جۋرناليست ەۆگەنيا بالتاتاروۆا دا قازاقستان بيلىگى ناتاليا نارسكايانى 25 قازانعا دەيىن رەسەيگە ەكستراديسيالاماق بولىپ وتىرعانىن جازعان. ونىڭ بولجامىنشا، قازاقستان باس پروكۋراتۋرانىڭ شەشىمى دە شىعىپ قويعان بولۋى ىقتيمال.

رەسەيدىڭ ۋكرايناعا باسقىنشىلىعىن ايىپتاپ سۇحبات بەرگەن رەسەيلىك ناتاليا نارسكايا ەكى ايدان بەرى قازاقستان اباقتىسىندا وتىر. 22 شىلدەدە الماتى پوليسياسى ونى رەسەيدىڭ سۇراۋى بويىنشا ۇستاعان. كەيىن سوت نارسكايانى 12 ايعا قاماۋ تۋرالى شەشىم شىعاردى.

وسى ىسپەن اينالىسىپ جاتقان ادام قۇقىقتارى جونىندەگى بيۋرو قىزمەتكەرى، قۇقىق قورعاۋشى دەنيس جيۆاگونىڭ ايتۋىنشا، نارسكايا قازاقستاننان بوسقىن مارتەبەسىن سۇراپ، ءوتىنىش تاستاماعان. سوندىقتان قازاقستان ونى ەكستراديسيا تارتىبىمەن رەسەيگە بەرە الادى. ەگەر ول رەسمي استانادان بوسقىن مارتەبەسىن سۇراسا، قازاقستاندا شامامەن ءبىر جىلعا دەيىن قالا الادى.

دەنيس جيۆاگونىڭ سوزىنشە، بۇعان دەيىن نارسكايا كەلىسىمشارت، قۇجاتتاردى جىرتىپ تاستاعان. قۇقىق قورعاۋشى "قاماۋداعى رەسەي ازاماتىنىڭ پسيحيكالىق جاعدايى قيىن" دەيدى.

قازاقستان باس پروكۋراتۋراسى ازىرگە بۇعان قاتىستى رەاكسيا بىلدىرمەدى.

29 جاستاعى ناتاليا نارسكايا سوعىسقا دەيىن رەسەيدە ۆوكالدان ساباق بەرگەن. رەسەي ۋكرايناعا باسىپ كىرگەن سوڭ الماتىعا كوشكەن. وعان رەسەيدە "بۇقارالىق اقپارات قۇرالدارى ارقىلى ەكسترەميستىك ارەكەتكە شاقىردى، الەۋمەتتىك ارازدىق قوزدىردى" دەگەن ايىپ تاعىلىپ، حالىقارالىق ىزدەۋ جاريالانعان.

قۇقىق قورعاۋشىنىڭ ايتۋىنشا، نارسكايانىڭ قۋدالانۋىنا YouTube-تەگى ارنالاردىڭ بىرىنە بەرگەن سۇحباتى ىلىك بولعان. وندا نارسكايا رەسەي بيلىگى مەن سوعىستى قولدايتىن رەسەيلىكتەردى سىنايدى. نارسكايا سۇحباتتا ءوزىن "رۋسوفوبپىن" دەپ اتايدى.