قازاقستان مۇسىلماندار ءدىني باسقارماسى پالەستيناداعى قاقتىعىسقا بايلانىستى مالىمدەمە جاسادى.
– يسلام دىنىندەگى قاسيەتتى ءۇشىنشى مەكەن سانالاتىن قۇدىس جەرىندە بولىپ جاتقان قانتوگىسكە قاتتى الاڭداۋشىلىق بىلدىرەدى جانە قانشاما جىلدان بەرى شەشىمىن تاپپاي كەلە جاتقان ماسەلەنىڭ بەيبىت جولمەن، ءوزارا ىمىرا اياسىندا شەشىلۋىن تىلەيدى.
ادامزات بالاسىن بىرلىك پەن يگىلىككە شاقىرعان پايعامبارلار ءىزى قالعان قاسيەتتى مەكەننىڭ بۇگىندە سوعىس الاڭىنا اينالىپ، مىڭداعان بەيكۇنا جانداردىڭ، اسىرەسە سابيلەر مەن بەيبىت تۇرعىنداردىڭ وققا ۇشىپ، قازا تابۋى بارشامىزدىڭ جانىمىزعا قاتتى باتۋدا. اۋىر جاراقات الىپ، ۇرەي قۇشاعىندا ءومىر ءسۇرىپ وتىرعان جانداردىڭ تەز ساۋىعىپ كەتۋىن تىلەيمىز، – دەلىنگەن مالىمدەمەدە.
سونداي-اق ءمۇفتيات تاراپتاردى بەيبىت كەلىسىمگە كەلۋگە جانە قانتوگىستى شۇعىل توقتاتىپ، حالىققا زارار كەلتىرمەۋگە ۇندەدى.
– سونداي-اق، پالەستينا حالقىنىڭ حالىقارالىق كەلىسىمدەر مەن رەزوليۋسيادا بەكىتىلگەن تاريحي قۇقىعىن قولدايتىندىعىمىزدى مالىمدەيمىز.
ەلىمىزدەگى بارشا مۇسىلمان قاۋىمىن قاسيەتتى مەكەننىڭ تىنىشتىعى مەن اماندىعى ءۇشىن دۇعا جاساۋعا شاقىرامىز. اللا تاعالا جەر بەتىن ءتۇرلى بۇلىكتەر مەن سوعىستان امان ەتكەي. ءامين!، – دەپ مالىمدەدى قمدب.
پىكىر قالدىرۋ