اقمولا وبلىسىنداعى كوكشەتاۋ قالاسىندا بەلسەندىلەر باۋىرجان بالتاشيەۆ، قۋات مۇحامەدجانوۆ جانە ءۋاليحان نىعمەتوۆتەر اكىمشىلىك جازامەن 15 تاۋلىككە قامالدى.
سوت ولاردى زاڭسىز جيىنعا قاتىسىپ، ءبىر جىلدا ەكىنشى مارتە اكىمشىلىك ءتارتىپتى بۇزدى دەپ تانىدى.
سوت شەشىمىندە نىعمەتوۆ پەن مۇحامەدجانوۆ "اقمولا وبلىسىنىڭ كوكشەتاۋ قالاسىنداعى ادىلەت دەپارتامەنتى عيماراتىندا" بەيبىت جيىنعا قاتىسقانى جازىلعان. بۇل جيىنعا جەرگىلىكتى اقتارۋشى بيلىك رۇقسات بەرمەگەن. وسى جيىنعا قاتىسقانى ءۇشىن بالتاشيەۆقا دا اكىمشىلىك جازا بەلگىلەنگەن، ءبىراق ول ادىلەت دەپارتامەنتى عيماراتى "ماڭىنداعى" جيىنعا قاتىسقان.
ۇشەۋى دە اكىمشىلىك ءتارتىپ بۇزىلعانى تۋرالى حاتتامامەن كەلىسپەدى.
بۇنىڭ الدىندا "بەلسەندىلەرەكسترەميستەمەس" قۇقىق قورعاۋشىلار توبىنىڭ telegram-ارناسىندا نىعمەتوۆ، مۇحامەدجانوۆ جانە بالتاشيەۆتەردىڭ سوتى وتەتىنى حابارلانعان. ولار بيىل اقپاندا وپپوزيسيالىق "العا، قازاقستان!" پارتياسىن قۇرۋ جونىندەگى باستاماشىل توپ مۇشەلەرى جيناعان قولدى راستاۋ ءۇشىن ادىلەت دەپارتامەنتىنە بارعان.
2022 جىلعى مامىردان بەرى بەلسەندىلەردىڭ پارتيانى تىركەۋ ءوتىنىشى 20 مارتە قابىلدانبادى. بيلىك پارتيانى تىركەۋ ءوتىنىشى "تالاپقا ساي ەمەس" دەپ، وپپوزيسيالىق پارتيانى تىركەمەي وتىر.
پىكىر قالدىرۋ