اتىراۋ وبلىسىنىڭ ەكس-اكىمى بەرگەي رىسقالييەۆتىڭ اناسى قايتىس بولدى. بۇل تۋرالى بۇرىنعى اكىمنىڭ ءوزى فەيسبۋك جەلىسىندەگى پاراقشاسىندا جازدى.
"بۇگىن ءومىر سىيلاعان، جارىق دۇنيەگە اكەلگەن انامنان ايرىلدىم...
مەرەيىمىز تاسىعاندا قۋاناتىن، قيىنشىلىعىمىزدا بىزدەن بەتەر ۋايىمدايتىن انامىز بۇل ومىردەن ءوتتى. ايىقپاس دەرتى تۋرالى بىلگەن سوڭ «قۇلىندارىم، ەندى سەندەردى كورمەيتىن شىعارمىن، قوش بولىڭدار!» دەپ جاقىندا عانا ءبىزدى ءبىر قۇشاعىنا الىپ كەتىپ ەدى…
«مەنى ساۋلەبايدىڭ قاسىنا قويىڭدار» دەپ كوزى تىرىسىندە اكەمىزدىڭ جانىنا جەرلەۋدى وسيەت ەتىپ كەتكەن بولاتىن. سوڭعى وسيەتىن ورىندايمىز. انامىزدى اقتوبە وبلىسىندا جەر قوينىنا تاپسىرامىز.
قوش بول، اناشىم! ءوزىم كەلىپ، توپىراعىڭدى سالا الماعانىم ءۇشىن كەشىر… زامان وزگەرەر، مەن دە ەلگە كەلەرمىن، سىزگە دە، اكەمە دە قۇران وقىتارمىن!
ومىردە تەك جاقسىلىق جاساپ، تالاي ادامعا قامقور بولعان، اۋلەتىمىزدىڭ ۇيىتقىسىنا اينالعان انامدى اللا تاعالا پاناسىنا السىن"، دەپ جازدى بەرگەي رىسقالييەۆ.
بەرگەي رىسقالييەۆ 2006-2012 جىلدارى اتىراۋ قالاسى مەن اتىراۋ وبلىسىنىڭ اكىمى قىزمەتىن اتقارعان.
- 2013 جىلى ەكس-اكىمگە "اسا ءىرى كولەمدەگى بيۋدجەت قارجىسىن جىمقىردى جانە جانە قىلمىستىق توپ قۇردى" دەگەن ايىپ تاعىلعان.
- تەرگەۋ بەس جىلعا سوزىلىپ، 2019 جىلى قازاقستان سوتى بەرگەي رىسقالييەۆتى 17 جىلعا، اعاسى ارمانجان رىسقالييەۆتى 16 جىلعا سىرتتاي سوتتاعان. ولاردىڭ قۇنى ميللياردتاعان تەڭگە تۇراتىن دۇنيە-مۇلكىن تاركىلەگەن.
الايدا 2020 جىلى جازدا قازاقستان سوتى بەرگەي رىسقالييەۆتىڭ وتباسى مەن جاقىندارىنان تاركىلەنگەن مۇلىكتىڭ "ءبىر بولىگىن" قايتارۋ تۋرالى شەشىم شىعارعان.
پىكىر قالدىرۋ