مەملەكەتكە جانە جەكە كاسىپكەرلەرگە ۇلكەن شىعىن اكەلگەن قاندى وقيعادان سوڭ الماتىدا اكىمدىك عيماراتىنان باستاپ تۇگەلى قالپىنا كەلتىرىدى. الايدا سوت كىنالى دەپ تانىعان 24 قاڭتارشىدان ماتەريالدى شىعىن وندىرىلمەك. وتەماقىنىڭ جالپى قۇنى 128 ملن تەڭگە.

ادۆوكاتتاردىڭ ايتۋىنشا، تالاپ-ارىزداردان كوپتەگەن شيكىلىكتەر انىقتالىپ وتىر. مەملەكەتتىك مەكەمەلەر قانداي دالەلدەمەلەرگە سۇيەنىپ وتىرعانىن قوسىپ، ىسكە تىركەۋى ءتيىس ەدى. ۇقك 24 ادامنىڭ ناقتى كىناسىن دالەلدەۋگە تىرىسپاعان، نەگىز جازۋدى دا قاجەت دەپ تاپپاعان. سوت كەزىندە ءبىر دە ءبىر ايىپتالۋشىنىڭ ءتۇرىن تانىپ، دالەلدەي الماعان.

ۇقك الماتى وبلىسى بويىنشا شەكارا قىزمەتىنىڭ دەپارتامەنتى ءوز قورىتىندىسىنا ادۆوكات قورعاۋىنداعى ازاماتتارعا ەش قاتىسى جوق مۇلىكتەردى قوسىپ قويىپتى. اتاپ ايتقاندا، كاماز، ۋرال سياقتى ءىرى اۆتوكولىكتەر مەن قىزمەتكەرلەردىڭ كەۋدەشە، باتەڭكە سەكىلدى ۇساق-تۇيەك دۇنيەلەرگە دەيىن تىزگەن. ونسىز دا جوقشىلىقتان قاجىپ، قاڭتاردا كوشەگە شىققاندار ەندى مەملەكەتكە قارىز بوپ قالدى.

جالعاس ساپارحانوۆا، ادۆوكات:

 – جابىرلەنۋشىنىڭ وكىلدەرى تالاپ-ارىزدارىن ناقتىلاي المادى. الماتى وبلىسىنىڭ شەكارا قىزمەتىنىڭ وكىلى وتەماقى سوماسىن 147 ملن تەڭگە دەپ شىعارىپ قويعان. كەيىن 128 ملن دەپ ازايتتى. قورىتىندى مەن ارىزداعى ساندار سايكەس كەلمەيدى. 2023 جىلى19 مامىردا وتكەن سوت وتىرىسىندا دا وتەماقىنىڭ مولشەرىن ناقتىلاي الماعانىن. قولىمىزعا ءتۇسىپ وتىرعان مىنا تالاپتىڭ دا زاڭسىز جانە نەگىزسىز ەكەنىن دالەلدەۋگە ءبىز بارىمىزدى سالامىز. قاڭتارشىلارعا كەلگەن حابارلاماعا سايكەس، 2 قاراشاعا الدىن الا تىڭداۋ، ال 6 جەلتوقسانعا باستى سوت تالقىلاۋىن تاعايىنداعان. ياعني، سوتتىڭ شەشىمى دايىن دەگەن ءسوز. ق ر ازاماتتىق پروسەسسۋالدىق كودەكسىنىڭ 30-بابىندا تالاپكەرلەر جاۋاپتىلاردىڭ بىرەۋىنىڭ مەكەن-جايى بويىنشا تالاپ-ارىزدى بەرۋگە قۇقىلى. ءبىراق ءىس بويىنشا 24 قاڭتارشىنىڭ تۇرعىلىقتى ورنى كورسەتىلسە دە، ءىس اسكەري سوتقا جىبەرىلدى. بۇل ۇلكەن كۇدىك تۋعىزادى.

ەركەبۇلان قايرات ۇلى، ادۆوكات:

– سوت تەرگەۋدە قىلمىستىق ءىس قۇجاتتارىن زەرتتەۋ بارىسىندا قىلمىستىق كودەكستىڭ 74-بابىنا سايكەس، جاۋاپكەر رەتىندە ەشكىمدى تاني المادى. تىزىمدەگى 50 دانا كيەۆلار شلەم مەن 24 دانا تەمىر قالقاندى كوتەرىپ اكەتۋ مۇمكىن ەمەس. ءىرى كولىكتەردى جارىپ جىبەردى دەگەنى دە اقىلعا سىيمايدى. ول دۇنيەلەر باسقا جاقتا، ايىپتاۋشىلار باسقا جەردە جۇرگەن. ورىندارى، مەكەن جايلارى سايكەس ەمەس. 

سىدىق ەراسىل، قاڭتار وقيعاسىنا قاتىسۋشى:

– اسكەري سوت ءارقايسىمىزدان 6،5 ملن تەڭگە كولەمىندە وتەماقى تالاپ ەتىپ وتىر. ونى تولەۋگە شامام جوق جانە ءوزىمدى تولەۋگە مىندەتتى دەپ سانامايمىن. تىزىمدەگى زاتتاردى مەن بۇلدىرمەدىم. سوتتا دالەلدەر كەلتىرمەدى. كۋاگەرمىن دەپ كەلگەندەردىڭ ەشقايسىسى ءبىزدىڭ ارامىزدان ەشكىمدى تاني المادى.

ابۋباكىر قانات مارات ۇلى، ايىپتالۋشى:

– قاڭتار وقيعاسى بويىنشا ءىستى بولعان ازاماتتاردىڭ ءبىرىمىن. باسىمدى امان ساقتاپ قالۋ ءۇشىن قويىلعان شارتتارمەن كەلىسىپ، كىنانى موينىما الدىم. ءبىراق بۇل مۇلىكتەردى زاقىمداماق تۇگىلى، مەن الاڭنىڭ ماڭىنا دا جولاماعان ەدىم. مەن جەكە كاسىپكەرمىن، قول استىمداعى جۇمىسشىلارىم شىققانى ءۇشىن مەنى دە تەرگەۋگە تارتتى. 128 ملن تەگەنى 24 ادامعا بولگەنى اعاتتىق، سەبەبى الاڭعا تەك ولار عانا ەمەس، 10 مىڭ قازاقستاندىق شىقتى. ءبىراق تەرگەۋگە تەك ءبىز تۇستىك. ەڭ سوراقىسى، جازىقسىز قۇربان بولىپ كەتىپ بارامىز.