ءماجىلىس ءتوراعاسى ەرلان قوشانوۆ رەسمي ساپارمەن وزبەكستان رەسپۋبليكاسىنا باردى. تاشكەنتتە وزبەكستان وليي ءماجىلىسىنىڭ زاڭ شىعارۋ پالاتاسى مەن قازاقستان پارلامەنتى ءماجىلىسىنىڭ اراسىنداعى پارلامەنتارالىق ىنتىماقتاستىق كەڭەسىنىڭ ءبىرىنشى وتىرىسى ءوتتى.

پارلامەنتارالىق ىنتىماقتاستىق كەڭەسىن قۇرۋ تۋرالى شەشىم وزبەكستان پرەزيدەنتى شاۆكات ميرزيويەۆتىڭ 2021 جىلعى جەلتوقسانداعى استاناعا مەملەكەتتىك ساپارى بارىسىندا قابىلدانعان ەدى. بۇل – ەكى ەل پارلامەنتتەرى اراسىنداعى ءوزارا ىقپالداستىقتىڭ تىڭ جانە جەتىلدىرىلگەن فورماتى.

– ءبىزدىڭ پرەزيدەنتتەرىمىز قاسىم-جومارت توقايەۆ پەن شاۆكات ميرزيويەۆتىڭ جەكە كەلىسىمدەرىنىڭ ارقاسىندا ەكى ەلدىڭ ىنتىماقتاستىعى وداقتاستىقتىڭ جاڭا دەڭگەيىنە كوتەرىلدى. بۇل – قازاقستان مەن وزبەكستان اراسىنداعى قارىم-قاتىناستىڭ جاڭا كەزەڭى. ال مەملەكەت باسشىلارى بارلىق كەلىسىمنىڭ جوعارى دەڭگەيدە ۋاقتىلى ءارى دۇرىس ورىندالۋىنا پارلامەنتتىك باقىلاۋ جاساۋدى پارلامەنتارالىق ىنتىماقتاستىق كەڭەسىنە جۇكتەدى، – دەدى ءماجىلىس سپيكەرى.

​​​وتىرىس بارىسىندا ەكى ەل دەپۋتاتتارى ساۋدا-ەكونوميكالىق، كولىك، اگرارلىق، مادەني-گۋمانيتارلىق سالالارداعى ىنتىماقتاستىقتى جانە سۋ ديپلوماتياسى ماسەلەلەرىن تالقىلادى.

​​​ەرلان قوشانوۆ وزبەكستان قازاقستاننىڭ وڭىردەگى ەڭ ءىرى ەكونوميكالىق سەرىكتەسى ەكەنىن اتاپ ءوتتى. ورتالىق ازيا ەلدەرىمەن تاۋار اينالىمى جالپى كولەمىنىڭ 62،5 پايىزدان استامى وسى ەلگە تيەسىلى. 2022 جىلدىڭ قورىتىندىسى بويىنشا قازاقستان مەن وزبەكستان اراسىنداعى ساۋدا-ساتتىق رەكوردتىق 5 ملرد اقش دوللارىنا جەتتى. ەكى ەل ۇكىمەتتەرىنىڭ الدىندا بۇل كورسەتكىشتى 10 ملرد دوللارعا دەيىن ارتتىرۋ مىندەتى تۇر.

​​ «ورتالىق ازيا» حالىقارالىق ونەركاسىپتىك كووپەراسيا ورتالىعىنىڭ قۇرىلىسى – كەلەشەگى زور بىرلەسكەن جوبالاردىڭ ءبىرى. ونى وڭىردەگى ءىرى ساۋدا-ونەركاسىپتىك حابقا اينالدىرۋ كوزدەلىپ وتىر.

​​​سونداي-اق قازاقستان پارلامەنتشىلەرى وزبەكستاننىڭ «مازاري-شاريف – كابۋل – پەشاۆار» تەمىرجولىن جانە «بەلارۋس – رەسەي – قازاقستان – وزبەكستان – اۋعانستان – پاكىستان» ءمۋلتيمودالدى ءدالىزىن سالۋ ارقىلى ترانساۋعان ءدالىزىن دامىتۋ جونىندەگى باستامالارىنا قولداۋ ءبىلدىردى.

كۇن تارتىبىندەگى ماڭىزدى ماسەلەنىڭ ءبىرى – ترانسشەكارالىق سۋ نىساندارىن بىرلەسىپ باسقارۋ جانە ءتيىمدى پايدالانۋ تۋرالى ۇكىمەتارالىق كەلىسىمدى كەلىسۋ ءراسىمىن جانە ورتالىق ازيا ەلدەرىنىڭ حالىقارالىق سۋ-ەنەرگەتيكا كونسورسيۋمىن قۇرۋ مۇمكىندىگىن تالقىلاۋ بولدى.

كەزدەسۋ قورىتىندىسى بويىنشا دەلەگاسيا باسشىلارى قازاقستان پارلامەنتى ءماجىلىسى مەن وزبەكستان وليي ءماجىلىسىنىڭ زاڭ شىعارۋ پالاتاسى اراسىنداعى پارلامەنتارالىق ىنتىماقتاستىق كەڭەسى تۋرالى ەرەجەگە قول قويدى. پارلامەنتارالىق ىنتىماقتاستىق كەڭەسى جىلىنا كەمىندە ءبىر رەت تۇراقتى تۇردە وتكىزىلىپ وتىرادى.

ساپار اياسىندا ءماجىلىس ءتوراعاسى وزبەكستان پرەزيدەنتى شاۆكات ميرزيويەۆپەنكەزدەستى. ەرلان قوشانوۆ مەملەكەت باسشىسى قاسىم-جومارت توقايەۆتىڭ سالەمىن جەتكىزىپ، ەلدەگى ىرگەلى وزگەرىستەر تۋرالى ايتتى. ءماجىلىس سپيكەرى وزبەكستان باسشىسىنا پارلامەنتارالىق ىنتىماقتاستىق كەڭەسىنىڭ ءبىرىنشى وتىرىسىنىڭ قورىتىندىلارى مەن ەكى ەل پارلامەنتتەرى اراسىنداعى ءوزارا ىس-ارەكەتتىڭ قازىرگى جاعدايى تۋرالى مالىمەت بەردى. سونداي-اق رەسپۋبليكا كۇنىن مەرەكەلەۋگە ارنالعان سالتاناتتى جيىندا قازاقستان پرەزيدەنتىنىڭ حالىققا ارناعان اۋقىمدى يدەولوگيالىق ۇندەۋىنە ەرەكشە نازار اۋداردى.وندا مەملەكەتتىڭ ءجۇرىپ وتكەن جولىنا وبەكتيۆتى دە تاريحي باعا بەرىلدى.

سونداي-اق وزبەكستان سەناتىنىڭ ءتوراعاسى تانزيلا ناربايەۆامەن جانە وليي ءماجىلىسى زاڭ شىعارۋ پالاتاسىنىڭ سپيكەرى نۋريددين يسمويلوۆپەن كەزدەسۋلەر ءوتتى.وندا تاراپتار كوميتەتتەردەگى، دوستىق توپتارىنداعى جانە باسقا دا الاڭدارداعى پارلامەنتارالىق قاتىناستاردىڭ كەلەشەگىن تالقىلادى. قازىرگى ۋاقىتتا وليي ءماجىلىس دەپۋتاتتارى ەل زاڭناماسىن جاڭا كونستيتۋسياعا سايكەستەندىرۋمەن اينالىسىپ جاتىر. بۇل ورايدا ەرلان قوشانوۆ قازاقستاننىڭ تاجىريبەسىن بولىسۋگە دايىن ەكەنىن جەتكىزدى.

ساپار اياسىندا ءماجىلىس دەلەگاسياسى تاشكەنت پەن سامارقاندتاعى كورنەكتى تاريحي ورىنداردى ارالادى.