الماتىدا بىرنەشە نوميناسيالار بويىنشا ءدىن سالاسىنىڭ وزەكتى ماسەلەلەرى تۋرالى ۇزدىك ماتەريالداردى (ماقالالار، قىسقا بەينەروليكتەر جانە ت.ب.) دايىنداۋ بايقاۋىنىڭ جەڭىمپازدارى ماراپاتتالدى.
بايقاۋعا 4 نوميناسيا بويىنشا 160-تان استام ءوتىنىم جۇمىسى كەلىپ ءتۇستى.
سالتاناتتى ماراپاتتاۋ ءراسىمى 7 قاراشا كۇنى ساعات 11:00-دە «Holiday Inn Almaty» قوناق ۇيىندە، «Aport Ballroom 1» زالىندا ءوتتى. اتالعان ءىس-شارانى الماتى قالاسى ءدىن ىستەرى جونىندەگى باسقارماسىنىڭ تاپسىرىسى بويىنشا «JASTAR» دامىتۋ ورتالىعى» جاستار قوعامدىق بىرلەستىگى ۇيىمداستىردى.
بايقاۋعا الماتى قالاسىندا جۇمىس جاسايتىن جەرگىلىكتى جانە رەسپۋبليكالىق ب ا ق جۋرناليستەرى، ستۋدەنتتەر، تاۋەلسىز پۋبليسيستەر مەن بلوگەرلەر قاتىستى. بايقاۋعا ورىس جانە قازاق تىلدەرىندە بارلىعى 160-تان استام ءوتىنىم جۇمىسى كەلىپ ءتۇستى. ۇسىنىلعان جۇمىستار ءدىني زاڭناما نورمالارىن ءتۇسىندىرۋ، كونفەسسياارالىق كەلىسىم مەن تولەرانتتىلىق، ەكسترەميستىك ءدىني اعىمداردىڭ اسەر ەتۋ ءقاۋپى، ءدىني ەكسترەميزم مەن تەرروريزمنىڭ الدىن الۋ جانە وعان قارسى كۇرەس سياقتى وزەكتى ماسەلەلەردى قامتيدى. قازىلار القاسى بارلىق وتىنىمدەردى قاراپ، جەڭىمپازداردى كەلەسى نوميناسيالار بويىنشا انىقتالدى:
- «ينتەرنەت-رەسۋرستاعى قازاق تىلىندەگى ۇزدىك ماقالا» نوميناسياسى بويىنشا - قانات سۇلەيمەنگە 250 000 تەڭگە اقشالاي سىياقى جانە سەرتيفيكات تابىستالدى؛
- «ينتەرنەت-رەسۋرستاعى ورىس تىلىندەگى ۇزدىك ماقالا» نوميناسياسى بويىنشا - داستان ەلدەكە 250 000 تەڭگە اقشالاي سىياقى جانە سەرتيفيكات تابىستالدى؛
- «ينتەرنەتتەگى جانە الەۋمەتتىك جەلىلەردەگى ەڭ جاقسى تاقىرىپتىق قىسقا بەينەروليك» نوميناسياسى بويىنشا - ولجاس ايتبانوۆ، اسحات بايتورە جانە ەرسۇلتان راحيمبەككە جەكەلەي 120 000 تەڭگە اقشالاي سىياقى جانە سەرتيفيكاتتار تابىستالدى. (قازىلار القاسىنىڭ شەشىمىمىەن اتالعان نوميناسيا بويىنشا قاراستىرىلعان 350 000 تەڭگە جالپى جۇلدە قورى ەڭ ۇزدىك دەپ تانىلعان 3 جەڭىمپازعا تەڭدەي ءبولىندى)
- «ەڭ بەلسەندى بلوگەر» نوميناسياسى بويىنشا - ەلنار بەريكبايەۆقا 250 000 تەڭگە اقشالاي سىياقى جانە سەرتيفيكات تابىستالدى.
سونداي-اق، باسقا قاتىسۋشىلارعا 50 مىڭ تەڭگەدەگى سوماعا 5 اقشالاي ىنتالاندىرۋ سەرتيفيكاتى تابىستالادى.
جۇلدەلەردى تابىستاۋ ءۇشىن ءدىن ىستەرى جونىندەگى باسقارماسى باسشىسىنىڭ ورىنباسارى كوشەكە ەرعالي مەن قازىلار القاسىنىڭ وكىلى قۇرمانالييەۆا اينۇر شاقىرىلدى. بايقاۋدى ۇيىمداستىرۋشىلار ب ا ق پەن بلوگەرلەردىڭ ءدىن سالاسىنداعى اعارتۋشىلىق جۇمىستارىنىڭ ماڭىزدىلىعىن اتاپ ءوتتى. ولاردىڭ پىكىرىنشە، بۇل حالىقتىڭ ءدىني ساۋاتتىلىعىن ارتتىرۋعا، سونداي-اق ءدىني ەكسترەميزم مەن تەرروريزمنىڭ الدىن الۋعا جانە وعان قارسى كۇرەسكە قوسقان قوماقتى ۇلەس بولىپ تابىلادى. بايقاۋدى ۇيىمداستىرۋشى «JASTAR» دامىتۋ ورتالىعى» جاستار قوعامدىق بىرلەستىگى قازىلار القاسىنىڭ مۇشەلەرىنە اتقارعان جۇمىستارى ءۇشىن جەكە العىستارىن ءبىلدىردى. سونداي-اق، ۇيىمداستىرۋشىلار تاراپىنان بايقاۋعا قاتىسۋشىلاردىڭ بارلىعىنا ىنتالاندىرۋ سىيلىعى رەتىندە م.اۋەزوۆ تەاترىندا قويىلاتىن «قازاقتار» تاريحي دراماسىنا بيلەتتەر تابىستالدى.
پىكىر قالدىرۋ