ەكى پوليسيا قىزمەتكەرى كامەلەتكە تولماعان قىزدى زورلاپ، ونى ۆيدەوعا تۇسىرگەن. بۇل تۋرالى "نە مولچي" قورىنىڭ جەتەكشىسى دينا ءتاڭسارى حابارلادى. 

«بىزگە ءانونيمدى دەرەككوزدىڭ حابارلاۋىنشا، قونايەۆ قالاسىندا ەكى پوليسيا قىزمەتكەرى قىزمەت بابىن پايدالانىپ، 14 جاستاعى مەكتەپ وقۋشىسىمەن جىنىستىق قاتىناسقا ءتۇسىپ، ونى ۆيدەوعا ءتۇسىرىپ العان (ۆيدەونى ءقازىر ءتارتىپ ساقشىلارى تاراتىپ جاتىر). بىزگە بەلگىلى بولىپ وتىرعانداي، ونىڭ بىرەۋى كامەلەت جاسىنا تولماعاندار ءىسى جونىندەگى ينسپەكتور، ەكىنشىسى عيماراتتاردى قورعاۋ جونىندەگى پوليسيا قىزمەتكەرى. ءقازىر ەكەۋى دە تۇتقىندالىپ، قۇجات بويىنشا ەرتە جۇمىستان بوساتىلعان.

بۇل اقپارات قانشالىقتى راس، رۋستام ءابدىراحمانوۆ (الماتى وبلىستىق پوليسيا دەپارتامەنتى باستىعىنىڭ ورىنباسارى)؟ راستاۋدى نەمەسە جوققا شىعارۋدى تالاپ ەتەمىز!» — دەپ جازدى دينا ءتاڭسارى الەۋمەتتىك جەلىدەگى پاراقشاسىندا. 

دينا ءتاڭسارى بۇل وقيعانى باس پروكۋراتۋراسىنان، بالالاردىڭ قۇقىقتارىن قورعاۋ كوميتەتىنەن جانە دينارا زاكييەۆانىڭ جەكە باقىلاۋىنا الۋدى، اقپاراتتى ناقتىلاۋدى سۇرايدى. سونداي-اق اقپارات راستالعان جاعدايدا قىزعا پسيحولوگيالىق قولداۋ كورسەتۋدى جانە قىلمىستىق ءىستى باقىلاۋعا الۋدى ءوتىندى.