وبلىس اكىمى نۇرلان ۇرانحايەۆ باستاعان اباي وبلىسىنىڭ دەلەگاسياسى قحر شىڭجاڭ-ۇيعىر اۆتونوميالى اۋدانىنىڭ ءىرى ونەركاسىپ ورتالىعى – ءۇرىمجى قالاسىنا كەلدى. ساپار بارىسىندا كاسىپكەرلەر، بيزنەس وكىلدەرى مەن باسقارما باسشىلارى وڭىرلەر اراسىنداعى ۇزاق مەرزىمدى ىنتىماقتاستىقتى جانە ينۆەستيسيالىق جوبالاردى جۇزەگە اسىرۋ ماسەلەلەرىن تالقىلادى.

«جۇڭگو – ءبىزدىڭ ايماقتىڭ نەگىزگى ساۋدا-ەكونوميكالىق سەرىكتەسى. بيىل قاڭتار-قازان ايلارىندا اباي وبلىسىنىڭ جالپى تاۋار اينالىمىنىڭ 92% نەمەسە 266 ميلليون اقش دوللارى جۇڭگو وڭىرلەرىمەن شەكارالىق ساۋدا ارقىلى قامتاماسىز ەتىلگەن. ماسەلەن، ەكسپورت 178 ميلليون اقش دوللارىن، جۇڭگو ونىمدەرىنىڭ يمپورتى شامامەن 88 ميلليون اقش دوللاردى قۇرادى»، — دەدى نۇرلان ۇرانحايەۆ.

ساپار اياسىندا وبلىستان ارنايى بارعان دەلەگاسيا «سان باو» شىڭجاڭ ساۋدا-ونەركاسىپتىك كورپوراسياسى» ءجشس-نىڭ باسشىلىعىمەن كەزدەستى. بۇل كورپوراسيا جۇڭگو ەلىنىڭ ەڭ ءىرى ەكسپورتتىق-يمپورتتىق ساۋدا، شەتەلدە قۇرىلىس جوبالارى ارقىلى كەلىسىمشارت جاساۋ، ءوندىرىس پەن وڭدەۋ، قويما جانە لوگيستيكا، تۋريستىك ساۋدا قىزمەتتەرىن ۇسىناتىن ساۋدا كەشەنى.

شىڭجاڭ جانە قازاقستان ەلىنىڭ كاسىپكەرلەرى اراسىندا ىسكەرلىك كەزدەسۋ ءوتىپ، وندا قحر شىڭجاڭ-ۇيعىر اۆتونوميالى اۋدانىنىڭ ءىرى كومپانيالارى جانە اباي وبلىسىنان ارنايى كەلگەن كاسىپكەرلەر، بيزنەس وكىلدەرى اراسىندا ىنتىماقتاستىق تۋرالى ءبىرقاتار كەلىسىمدەرگە قول قويىلدى.

بۇدان بولەك، اباي وبلىسىنىڭ اكىمى قكپ وك ساياسي بيۋروسىنىڭ مۇشەسى، قحر شىڭجاڭ-ۇيعىر اۆتونوميالىق اۋدانى قكپ پارتيا كوميتەتىنىڭ حاتشىسى ما سينجۋيمەن كەزدەستى. كەزدەسۋ بارىسىندا وڭىرلەر اراسىنداعى ساۋدا-ەكونوميكالىق ىنتىماقتاستىقتىڭ دامۋى جان-جاقتى ساراپتالدى.

باستى نازار ءوڭىرارالىق ىنتىماقتاستىق ماسەلەسىنە اۋدارىلدى. بۇگىندە قازاقستان شىڭجاڭمەن ونەركاسىپ، كولىك، لوگيستيكا، اۋىل شارۋاشىلىعى جانە تۋريزم سالاسىندا ۇلكەن تابىسقا جەتىپ وتىر. ەكى ايماقتىڭ تۇراقتى دامۋىنا ىقپال ەتەتىن بۇل ىنتىماقتاستىقتى نىعايتۋ مەن كەڭەيتۋدىڭ قوسىمشا مۇمكىندىگىنە باسا نازار اۋدارىلدى.

ءوز كەزەگىندە قحر شىڭجاڭ-ۇيعىر اۆتونوميالىق اۋدانى قكپ پارتيا كوميتەتىنىڭ حاتشىسى ما سينجۋي قازاقستان مەن جۇڭگو اراسىنداعى تىعىز ەكونوميكالىق قارىم-قاتىناستىڭ ستراتەگيالىق ماڭىزىنا توقتالدى. ول شىڭجاڭ-ۇيعىر اۆتونوميالى اۋدانى ءتۋريزمدى دامىتۋعا، «تاچەن-سەمەي» تىكەلەي اۋەرەيسىن اشۋعا، سونىمەن قاتار «باحتى» بەكەتىندە جۇك-كولىك اعىنىن ارتتىرىپ قانا قويماي، سونىمەن قاتار تۋريستەردىڭ دە قاتارىنا ارتتىرۋ ءۇشىن بەكەتتى جاڭعىرتۋ جۇمىستارىن جەدەلدەتۋدىڭ ماڭىزدىلىعىنا توقتالدى.

سونىمەن قاتار، ما سينجۋي شىڭجاڭ-ۇيعىر اۆتونوميالى اۋدانىنىڭ اباي وبلىسىمەن اۋىل شارۋاشىلىعى، گەولوگيالىق زەرتتەۋ، تاۋكەن-وندىرىسى، ەنەرگەتيكا جانە ءبىلىم بەرۋ سياقتى ستراتەگيالىق ماڭىزدى سالادا ىنتىماقتاستىقتى تەرەڭدەتۋگە دايىن ەكەنىن ايتتى. كورشى ءوڭىر اباي وڭىرىنەن ەت، استىق، جۇگەرى جانە كۇنباعىس مايىن الۋعا نيەت ءبىلدىردى، سونداي-اق، جەل ەلەكتر ستانسياسىن سالۋ جانە ستۋدەنتتەرمەن الماسۋ مۇمكىندىكتەرىن تالقىلاۋعا دايىن. وسى ورايدا، جاقىن ارادا اباي وبلىسىنا ارنايى قحر شىڭجاڭ-ۇيعىر اۆتونوميالى اۋدانىنان ارنايى دەلەگاسيا جىبەرۋ جوسپارلانعان.