1997 جىلى پرەزيدەنت بوپ تۇرعان نۇرسۇلتان نازاربايەۆ ءوزىنىڭ قازاقستان حالقىنا ارنالعان جولداۋىندا "قازاقستان-2030" ستراتەگياسىن جاريالاعان.

ۇلتتى ۇيىعان بىرلىككە، ەلدى بۇرىن-سوڭدى بولماعان ادىلدىككە، حالىقتى ءال-اۋقاتى تاسىعان بايلىققا جەتكىزەمىز دەپ سول زاماندا جارياعا جار سالدى. سايلاۋدى ءادىل وتكىزۋ، باق-قا ەركىندىك بەرۋ، ايەلدىڭ ءرولىن كۇشەيتۋ دەگەن سوزدەر بولعان وندا.  

ودان بەرى تالاي ۇرپاق اۋىستى، الگى ۋادەنىڭ ءبىرى دە جاقىنداعان جوق. ەسەسىنە ەلباسى قالپىندا نۇرەكەڭنىڭ ءوزى جەتە الماعان 2030 جىلعا بۇگىنگى قازاق توقايەۆپەن بىرگە تاياپ قالدى.

قازاقستان بيلىگىنىڭ تاۋەلسىزدىك العالى بەرى اينالىسىپ كەلە جاتقان ءىسى – الىستاعى جىلدارعا ارناپ جوسپار قۇرۋ. ءاي، وعان دەيىن ءوزىڭ بارسىڭ با، جوقسىڭ با – ويلانبايدى.

ۇلتتىق ەكونوميكا مينيسترلىگى قونايەۆ قالاسىنىڭ ماڭايىن دامىتۋدىڭ 2028 جىلعا ارنالعان كەشەندى جوسپارىن جاريالاي سالادى. كولىك ءمينيسترى استاناداعى اتىشۋلى LRT جوباسىنا 2025 جىلعا دەيىن جىلىنا 150 ملرد تەڭگەگە دەيىن سۇرايمىز دەيدى. اقشا تاپپاساق، ءتىپتى ۇلتتىق قوردان الامىز دەيدى.

10 جىلدان بەرى مىجىپ كەلە جاتقان، جەمقورلىقپەن اتاعى الەمگە تاراعان، نە توقتامايتىن، نە اياقتالىپ بىتپەيتىن جوبا.

تەك استانا وسى قالپىندا تۇرا بەرسە، حالقى قازىرگى قارقىنىمەن كوبەيە بەرسە، ارينە، LRT كەرەك جوبا. ءبىراق ەرتەڭ نە بولارىن ءبىر قۇداي بىلەدى. "بىزدەن كەيىن كۇل بولماسا ءبۇل بولسىن" دەگەن قۇرىلىسقا ۇقساپ تۇر. اۋا-رايى جايسىز، اۋىز سۋى جەتپەي جاتقان، قاتىناۋعا قيىنداۋ ايدالاداعى استانا. بيلىكتىڭ زورلىعىمەن، بۇگىننىڭ ساياساتىمەن عانا استانا بوپ تۇرعان شىعار؟ 

نازاربايەۆتىڭ ءوزىن قاعىپ تاستاعان قاڭتار وقيعاسى سياقتى كەز-كەلگەن وقىس وزگەرىس بولا قالسا شە؟

بيلىك ازىرگە وزىنەن كەيىن قازاقتا ءومىر بولمايتىنداي ويلايدى. انىعى، قازاقستاندا كەلىمدى-كەتىمدى بىرەۋ بولسا، ول – بيلىك. قازاق پەن قازاقستاندى مەكەندەيتىن حالىق بۇل جەردە قالا بەرەدى.