كەشە استانا قالاسى اكىمدىگى جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى كوميسسيا­نىڭ كەزەكتى وتىرىسى ءوتتى. جيىنعا اتالعان كوميسسيا ءتوراعاسى، قالا اكىمىنىڭ ورىنباسارى ەسەت بايكەن، كوميسسيا مۇشەلەرى، باسقارما باسشىلارى قاتىستى.

قالالىق ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ بيىل الەۋمەتتىك مەملەكەتتىك تاپسىرىس اياسىندا 11 جوبا جۇزەگە اسىرىلسا، وتباسى ينستيتۋتىنىڭ ماڭىزىن ەسكەرە وتىرىپ، سونىڭ ۇشەۋى وتباسى ماسەلەسىنە ارنالعانىن اتاپ ءوتتى.

– بۇل جوبالاردىڭ قاتارىندا تاتۋلاستىرۋ ورتالىعىن قۇرۋ، مەدياسيا كابينەتىنىڭ جۇمىسىن جولعا قويۋ بار. اتالعان كابينەت وسىمەن ەكىنشى جىل جۇمىس ىستەپ، بيىل 10 ايدا 300 ادامعا كومەك كورسەتتى. ونىڭ ىشىندە 180 ايەلگە ىشكى ىستەر ورگاندارىمەن بىرگە تۇرمىستىق زورلىق-زومبىلىق بويىنشا پروفيلاكتيكالىق جۇمىستار جۇرگىزىلدى. بۇگىنگى تاڭدا 29 وتباسى بويىنشا مەدياسيالىق كەلىسىم جاسالىپ، تاراپتاردىڭ كەلىسىمىمەن تاتۋلاسۋعا شەشىم شىعارىلدى. 32 ادام وڭالتۋ كۋرسىنان ءوتتى. سونىمەن قاتار گەندەرلىك مادەنيەتتى قالىپتاستىرۋعا باعىتتالعان كەشەندى ءىس-شارالار جۇرگىزۋدەمىز، – دەدى باسقارما باسشىسى.

كۇن تارتىبىندەگى ماسەلەلەر بويىنشا ءسوز العان قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب بۇل باسقارمادا بيىلعا مەملەكەتتىك الەۋمەتتىك تاپسىرىستار ماقساتتى توپتاردىڭ قاجەتتىلىكتەرىنە قاراي جانە حالىقتىڭ سۇرانىسىن باعالاۋعا باعىتتالا بەكىتىلگەنىن جەتكىزدى.

– 2023 جىلعا الەۋمەتتىك جوبالاردىڭ 5 سالاسى بويىنشا 28،8 ملن تەڭگە ءبولىندى. بۇل – ەستۋ قابىلەتى تومەن ادامداردى الەۋمەتتىك قولداۋ، اۋتيزم دياگنوزى بار بالالاردى وڭالتۋ، ەرەكشە قاجەتتىلىگى بار جانداردى وڭالتۋ تەحنيكالارىنا تەحنيكالىق قىزمەت كورسەتۋ جانە جوندەۋ، اباقتىدان شىققان ادامداردى وڭالتۋ بويىنشا از قامتىلعان ادامدارعا قىزمەت كورسەتۋ باعىتىنداعى جوبالار، – دەدى اتالعان باسقارما باسشىسى.

وتىرىس بارىسىندا سونداي-اق تۇرمىستىق زورلىق-زومبىلىق دەڭگەيىن تومەندەتۋ، جاسوسپىرىمدەر اراسىندا قىلمىستى بولدىرماۋ، قالاداعى ءبىلىم بەرۋ ۇيىمدارىنداعى جاستاردىڭ قاۋىپسىزدىگىن قامتاماسىز ەتۋ ماسەلەلەرى دە ءسوز بولدى. جاستار ساياساتى ماسەلەلەرى جونىندەگى باسقارما وكىلدەرى مەملەكەتتىك الەۋمەتتىك تاپسىرىس اياسىندا جۇزەگە اسىپ جاتقان 6 جوبا تۋرالى اقپارات بەردى.

– قوزعالىپ وتىرعان تۇرمىستىق زورلىق-زومبىلىق ماسەلەسى قازىرگى قوعامنىڭ قاسىرەتىنە اينالىپ وتىر. سوڭعى ورىن العان وقيعالار – سونىڭ ايقىن كورىنىسى. وكىنىشكە قاراي، تۇرمىستىق زورلىق-زومبىلىق كوپتەگەن وتباسىنىڭ كۇندەلىكتى ءومىر ءسۇرۋ ادەتىنە اينالىپ، وتباسى قۇندىلىعىنىڭ السىرەۋىنە اكەلىپ جاتىر. مەملەكەت باسشىسى قاسىم-­جومارت كەمەل ۇلىنىڭ ءوز جولداۋلارىندا ازاماتتار مەن قوعام تاراپىنان وتباسىنداعى زورلىق-زومبىلىق جاساعانى ءۇشىن جازانى كۇشەيتۋ قاجەتتىگى تۋرالى ۇندەۋلەردىڭ جيىلەپ كەتكەنىنە باسا نازار اۋدارىپ، تۇرمىستىق زورلىق-زومبىلىقتىڭ ەلىمىزدەگى ۇلكەن پروبلەمانىڭ بىرىنە اينالعانىن اتاپ ايتتى. بۇل رەتتە داعدارىس ورتالىقتارى تۇرمىستىق زورلىق-زومبىلىق قۇرباندارىنا ارنايى الەۋمەتتىك قىزمەتتەر كورسەتە وتىرىپ، وڭالتۋ جۇمىسىن جۇرگىزۋدە، – دەدى «ءۇمىت» داعدارىس ورتالىعىنىڭ ديرەكتورى عاليحان قوقانبەكوۆ.