زاڭناماعا توتەنشە جاعدايلاردى جويۋعا قاتىساتىن ەرىكتىلەردى ساقتاندىرۋعا قاتىستى وزگەرىستەر ەنگىزىلەدى. بۇل تۋرالى ۇلتتىق ۆولونتەرلىك جەلىنىڭ ءتوراعاسى ۆەرا كيم مالىمدەدى، حابار 24 ارناسى.
قازىرگى جوسپارعا سايكەس، ەرىكتىلەر الدىمەن وقىتۋ كۋرستارىنان وتەدى. سونىڭ ناتيجەسىندە ارنايى كۋالىك الادى. ودان كەيىن توتەنشە جاعدايلار مينيسترلىگىنە تىركەۋگە تۇرادى. وسىلايشا، مەملەكەت تاراپىنان ءتيىستى ساقتاندىرۋ الۋعا مۇمكىندىك بولادى.
"وكىنىشكە قاراي، ءبىز ەرىكتىلەر قىزمەتىنە ارنالعان زاڭعا بارلىق باستامالارىمىزدى ەنگىزە المادىق. الداعى ۋاقىتتا توتەنشە جاعدايلاردى جويۋعا اتسالىساتىن ەرىكتىلەردىڭ ءومىرىن ساقتاندىرۋعا ارنالعان نورمانى ەنگىزۋدى جوسپارلاپ وتىرمىز"، - دەيدى كيم.
ۇلتتىق ۆولونتەرلىك جەلى توتەنشە جاعدايلار مينيسترلىگىمەن مەموراندۋم دا راسىمدەپ ۇلگەردى. تۋرا سونداي ىنتىماقتاستىق دەنساۋلىق جانە ىشكى ىستەر ورگاندارىمەن دە جاسالادى. ءاربىر ۆەدومستۆو ءوزىنىڭ ەرىكتىلەر بازاسىن جۇرگىزەدى.
بۇگىندە ەرىكتىلەر ەلدە بولعان اپاتتاردا، حابار-وشارسىز كەتكەن ادامداردى ىزدەۋدە بەلسەندىلىك تانىتىپ جاتىر. وسىنداي قيىن قىستاۋ ساتتە ەرىكتىلەر ءوز ومىرلەرىنە ءقاۋىپ تونسە دە، كومەككە كەلەدى. سوندىقتان ۆولونتەرلەردى دە جان-جاقتى قورعاۋ كەرەك. بۇل باستامانى ءقازىر جۇزەگە اسىرۋ مۇمكىن بولماي تۇر. سەبەبى ەلدە توتەنشە جاعدايلار كەزىندە ناقتى جۇمىس ىستەي الاتىن ۆولونتەرلەردىڭ سانىن انىقتاۋ قيىنعا سوعۋدا.
ايتا كەتەرى، قازاقستاندا ەرىكتىلەردىڭ جالپى سانى 240 مىڭ ادامنان اسادى.
پىكىر قالدىرۋ