قالا تازالىعىنا جاۋاپتى كوممۋنالدىق قىزمەتكەرلەردىڭ ەڭبەگى ەرەكشە. ولار كۇندىز دە، تۇندە دە، كەز كەلگەن اۋا رايىندا جۇمىسىن توقتاتپايدى. ولاردىڭ قاجىرلى ءارى جاۋاپتى جۇمىسىنىڭ ارقاسىندا قالادا ءتارتىپ پەن تازالىق ساقتالادى. كوممۋنالدىق قىزمەتكەرلەر تۇرعىندارعا قولايلى جاعداي جاساۋ ءۇشىن جۇمىس ىستەيدى.

«استانا تازالىق» كاسىپورنىندا قازىرگى كۇنى 1848 ادام جۇمىس ىستەسە، قىسقا قاراي ولاردىڭ سانى كوبەيەدى، سەبەبى قار تازالاۋ جۇمىسى كوپ ادام كۇشىن قاجەت ەتەدى. مەكەمە قىزمەتكەرلەرىنىڭ ىشىندە اۋعان سوعىسىنىڭ ارداگەرى جانە چەرنوبىل اپاتىنىڭ زاردابىن جويۋعا قاتىسقان 12 ازامات ەڭبەك ەتەدى ەكەن. سونىڭ ءبىرى – بەيسەمبەك نارىنوۆ.

اۋعان سوعىسىنا كۇتپەگەن جەردەن بارىپ، ەكى جىل مايداندا بولعان بەيسەمبەك اعا وسى تازالىققا جاۋاپتى مەكەمەدە جۇمىس ىستەيدى. ءوزى – استانا قالاسىنىڭ تۋماسى. قورعالجىندا وسكەن. سول جاقتان اسكەرگە كەتىپ، 1979-1981 جىلدارى ورالعان. اۋعانستانداعى سوعىس كەزىندە بىرنەشە قالاسىنا كىرىپ، اسكەري قيمىلدارعا قاتىستى، تالاي رەت اجال اۋزىنان امان قالدى.

بەيسەمبەك نارىنوۆ «استانا تازالىق» سەرىكتەستىگىنە 2001 جىلى كەلگەندە ماشينيست بولعان. سودان بەرى ءبىر مەكەمەدە تابان اۋدارماي ەڭبەك ەتىپ كەلەدى، قازىرگى كۇنى جاستارعا كورگەن-بىلگەنىن ۇيرەتكەن ول – ۇجىمدا سىيلى، قۇرمەتتى جان، ەڭبەك ارداگەرى.

– قىسى-جازى بۇزىلىپ، ىستەن شىققان تەحنيكالاردى جوندەيمىن. ىستىقتا-سالقىندا تەمىر-تەرسەك اراسىندا ءجۇرىپ جۇمىس ىستەۋ، ارينە، وڭاي ەمەس. ءبىراق جاستايىمنان ەڭبەكتەنىپ، قارا جۇمىسقا ەرتە بەيىمدەلگەندىكتەن، قانداي شارۋا بولسا دا تارتىنباي جاسايمىن. قالا تازالىعىنا كەرەكتى تەحنيكا ءجيى جوندەۋدى، سىنعانىن وڭداۋدى قاجەت ەتەدى. كومەكشىم كەرەك تەمىرلەردى، قوسالقى بولشەكتەردى اپەرىپ تۇرسا، جوندەۋ جۇمىسىنا الاڭداماي كىرىسەمىن. ەسكىسىن جوندەيمىن نەمەسە قايتا قۇراستىرامىز، ايتەۋىر جۇمىسى كوپ، بەينەتى جەتىپ ارتىلاتىن، ءبىراق ۇجىمداستار اراسىندا ءقادىرلى كاسىپ قوي سلەسار دەگەن، وعان جاستار اراسىنان كەلەتىندەر تىم از. ءبىز سەكىلدى جۇرمەيدى، ولار تەز اقشا تاباتىن كاسىپتى مەڭگەرگىسى كەلەدى. وسى قىنجىلتادى مەنى، – دەيدى ناعىز ەڭبەك ادامى بەيسەمبەك قاراباي ۇلى.

كولىكتەردى، تەحنيكالاردى جوندەۋ جونىندەگى سلەسار – بۇل تەحنيكالىق قىزمەت كورسەتىپ، بولشەكتەۋدى، جوندەۋدى، اۋىستىرۋدى، دانەكەرلەۋدى، جيناۋدى جانە رەتتەۋدى جۇرگىزەتىن مامان. سلەساردىڭ مىندەتىنە اۆتوموبيلدەرگە تەحنيكالىق قىزمەت كورسەتۋ جانە ونى جوندەۋ، ەڭبەكتى قورعاۋ، قاۋىپسىزدىك تەحنيكاسى مەن ورتتەن قورعاۋ ەرەجەلەرىنىڭ ساقتالۋىن باقىلاۋ، پايدالانۋ ماتەريال­دارىنىڭ شىعىنىن ەسەپكە الۋ كىرەدى. ول فيزيكالىق توزىمدىلىگى مەن كۇشى ايرىقشا، شيراق، تەحنيكالىق ينتەللەكت، زەيىندى، بايقامپاز، شىدامدى، جاۋاپكەرشىلىگى جوعارى، اپات دابىلدارىنا تەز جاۋاپ بەرەتىن كاسىبي مامان بولۋى ءتيىس. بۇل رەتتە سلەسار كاسىبىنىڭ قىر-سىرىن مەڭگەرىپ، جاستاردى ۇيرەتۋدەن جالىقپاعان بەيسەمبەك نارىنوۆ سەكىلدى ەڭبەك ارداگەرىن اتاپ ءوتۋ ورىندى.

شىنىندا دا، قالانىڭ قىم-قۋىت تىرشىلىگىندە ەلوردا تۇرعىندارىنا قولايلى جاعداي جاساۋ ءۇشىن جۇمىس ىستەپ جاتقان كوممۋنالدىق قىزمەتكەرلەر ەڭبەگى قانداي دا ءبىر قولداۋعا لايىق.