بۇگىنگى جاھاندانۋ زامانىندا عىلىم مەن تەحنولوگيانىڭ قارىشتاپ دامىپ، التىن باستى ازاماتتارىنا ءار ەل ينۆەستيسيا قۇيىپ جاتقاندا ءبىزدىڭ مەملەكەتىمىز دە قالىس قالىپ، كوش سوڭىندا قالماۋى ءتيىس ەكەنى بەسەنەدەن بەلگىلى. وسى رەتتە پرەزيدەنتىمىز قاسىم-جومارت توقايەۆ ۇكىمەت باسىنداعىلارعا اسا ماڭىزدى تاپسىرما بەرىپ، سول تاپسىرماعا سايكەس ەلىمىزدە 2021-2025 جىلدارعا ارنالعان «ءبىلىمدى ۇلت» ساپالى ءبىلىم بەرۋ» ۇلتتىق جوباسى ازىرلەنگەن بولاتىن. قازىرگى ۋاقىتتا جوبا ءساتتى ىسكە اسىپ جاتىر.
جوبانىڭ ماقساتى ءبىلىم ساپاسىن كوتەرۋ، ءبىلىم بەرۋ نىساندارىن سالۋ، بىلىمگە قولجەتىمدىلىكتى ارتتىرىپ، وسى سالانى سيفرلاندىرۋدى قولعا الۋ جانە بالالاردىڭ وقۋى ءۇشىن قولايلى جاعداي جاساۋ سياقتى ءتۇرلى ماسەلەلەردى شەشۋگە باعىتتالعان.
جوبا اياسىندا 2025 جىلعا قاراي ءبىلىم بەرۋ سالاسى بويىنشا نەگىزگى كاپيتالعا ينۆەستيسيا 174،8 پايىزعا ءوسىپ، ءبىلىم بەرۋ سالاسىندا 5 ملن تەڭگەگە جۋىق قاراجات جقق-عا جۇمسالىپ، 104 مىڭعا جۋىق ءبىلىم بەرۋ سالاسىندا جاڭا جۇمىس ورىندارى اشىلماق ەكەن. جالپى «ءبىلىمدى ۇلت» ساپالى ءبىلىم بەرۋ» ۇلتتىق جوباسىنىڭ ىسكە اسۋىنا 2 ملرد تەڭگە ءبولىنىپ وتىر ەكەن. قازىرگى عىلىم مەن تەحنولوگيانىڭ زامانىندا ءبىلىم بەرۋ سالاسىنا قانشا قاراجات قۇيساڭ دا ارتىق ەتپەسى انىق.
«ءبىلىمدى ۇلت» ساپالى ءبىلىم بەرۋ» ۇلتتىق جوباسى اياسىندا ارينە استانا قالاسىندا دا ايتارلىقتاي ەلەۋلى جۇمىستار اتقارىپ جاتىر. قالا ەلىمىزدەگى نەگىزگى قالا، ياعني مەملەكەت استاناسىنا اينالعالى حالىقتىڭ سانىمەن بىرگە وقۋ ورىندارىنىڭ دا سانى ارتىپ، سايكەسىنشە شەشىلۋى ءتيىس ماسەلەلەر دە ارتتى. استانانىڭ كولەمى بىرنەشە ەسە ۇلكەيىپ، تۇرعىنۇيلەر ۇستى-ۇستىنە سالىنىپ جاتىر.
وسى رەتتە بيىلعى وقۋ جىلىندا قالادا جاڭادان 9 مەكتەپ ەسىگىن ءبىلىم الۋشى بالالارعا تۇڭعىش رەت ايقارا اشقانىن ايتا كەتۋ كەرەك. ولاردى اتاپ ايتساق، رىسقۇلوۆ كوشەسىندەگى، ر.قوشقاربايەۆ داڭعىلىنداعى جانە ۇلى دالا داڭعىلى مەن ساۋران كوشەسىنىڭ قيىلىسىنداعى، ۇلى دالا داڭعىلى مەن №39 كوشەنىڭ قيىلىسىنداعى جانە ت.ب. مەكتەپتەر.
الداعى وقۋ جىلىندا قالادا 2 اۋىسىمدا تاعى 13 مەكتەپ سالىنۋ جوسپارلانعان ەكەن. بۇل مەكتەپتەردىڭ ءار ءبىرى 4 مىڭ وقۋشى وقىتىپ شىعارا الادى. قالادا مەكتەپتەر سانى ارتىپ قانا قويماي، جاعداي دا جاسالىپ جاتىر. وقۋ ورىندارىنىڭ ماڭايىنا اعاش، گۇل وتىرعىزىلىپ، تيىسىنشە اباتتاندىرۋ جۇمىستارى جۇرگىزىلىپ جاتقان كورىنەدى.
تاعى ءبىر ايتا كەتەتىن جاعىمدى جاڭالىق، جاقىندا استانا قالاسىندا مەكتەپ وقۋشىلارىن كىتاپقا باۋلۋ ماقساتىندا ساباق الدىندا «8 مينۋت كىتاپ وقۋ» باستاماسى جۇزەگە اسا باستاعان بولاتىن. ياعني وقۋشىلار كۇندەلىكتى مەكتەپكە 8 مينۋت ەرتە كەلىپ، وزدەرى ۇناتاتىن كوركەم ادەبيەت وقيدى. شارا وقۋ جىلىنىڭ ەكىنشى توقسانىنان باستالعان. استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆتىڭ ايتۋىنشا بۇل شارا وقۋشىلاردىڭ كىتاپقا قىزىعۋشىلىعىن ارتتىرادى.
«بۇل جوبانى باستاۋداعى ماقساتىمىز ءاربىر وقۋشى كوركەم ادەبيەت وقىسا ەكەن دەيمىز. سەبەبى، كىتاپ وقىعان وقۋشىنىڭ ءبىلىمى، ءوي-ورىسى كەڭەيەدى. كىتاپ وقۋدىڭ پايداسى وراسان زور. سوزدىك قوردىڭ كوبەيۋىنە، ميدىڭ كۇندەلىكتى جاتتىعۋىنا جانە ەستە ساقتاۋ قابىلەتىنىڭ جەتىلىپ، بالانىڭ شىعارماشىلىق ويلاۋ جۇيەسىن جاقسارتادى. ودان وزگە ءبىلىم ساپاسىن كوتەرۋگە تيگىزەر اسەرى مول. سول سەبەپتى وسى جوبانى ويلاپ تاۋىپ، مەكتەپتەرگە ەنگىزىپ وتىرمىز»، – دەيدى قاسىمحان سەنعازىيەۆ.
سونداي-اق، مەكتەپتەردە «بۋككروسينگ» بۇرىشتارى اشىلىپ، وندا وقۋشىلار بىر-بىرىمەن كىتاپ الماسا باستادى. مەكتەپتەردىڭ فويەلەرىندە وقۋشىلارعا ارنالعان كوۆوركينگ زونالار دا بار. وسىنداي يگى باستامالاردىڭ ارقاسىندا باس قالامىز ءبىلىم قالاسىنا اينالىپ، ساۋاتتى دا سانالى ۇرپاق تاربيەلەۋ ۇستىندە ەكەنىن باسا ايتقىمىز كەلەدى.
پىكىر قالدىرۋ