جەلى قولدانۋشىلارى بويكوتتى كومپانيا قازاقشا سويلەۋدى تالاپ ەتكەن كۋرەردى جۇمىستان شىعارعان سوڭ جاريالادى.
قازاقستانداعى Magnum ساۋدا جەلىسى قازاقستاندىقتار الەۋمەتتىك جەلىدە جاپپاي بويكوت جاريالاعاننان كەيىن كۋرەردى جۇمىستان شىعارۋعا قاتىستى تۇسىنىكتەمە بەردى.
ەسكە سالايىق، الەۋمەتتىك جەلى قولدانۋشىلارىنىڭ ءبىرى Magnum ساۋدا جەلىسىنەن ۇيىنە ازىق-تۇلىككە تاپسىرىس بەرىپ، ونى اكەلگەن كۋرەردىڭ وزىنەن ءوز ۇيىندە قازاقشا سويلەۋدى تالاپ ەتكەنىن جازعان ەدى. كۋرەردىڭ قازاق تىلىندە "اتىڭ كىم؟" دەپ قويعان سۇراعىنا ول ورىسشا جاۋاپ بەرگەن. بۇعان اشۋلانعان كۋرەر "قازاقشا سويلە" دەگەن. وسى وقيعاعا بايلانىستى جەلى قولدانۋشىسى Magnum ساۋدا جەلىسىنە شاعىمدانىپ، كەيىن كومپانيا كۋرەردى جۇمىستان شىعارعانىن حابارلاعان ەدى.
بۇل وقيعا الەۋمەتتىك جەلىدە قىزۋ تالقىلانىپ، پىكىرلەر ەكىگە جارىلدى. قازاقشا سويلەۋدى تالاپ ەتكەن كۋرەردى جاقتاعان توپ جەلىدە Magnum ساۋدا جەلىسىنەن قارسى بويكوت جاريالادى.
وسىعان وراي، كومپانيا Instagram جەلىسىندە وقيعاعا قاتىستى تۇسىنىكتەمە بەرىپ، كۋرەردىڭ جۇمىستان نە ءۇشىن شىعارىلعانىن ءتۇسىندىردى.
"كۋرەردىڭ جۇمىستان بوساتىلۋ سەبەبى – كليەنتتەرمەن ءبىر ەمەس، ەكى ەمەس، بىرنەشە دۇركىن دورەكى سويلەسىپ، قىزمەت كورسەتۋ ادەبىن قايتالاپ بۇزۋى. ءبىز وعان ءوز قاتەلىگىن تۇزەتۋگە جەتكىلىكتى ۋاقىت بەردىك – ەسكەرتۋ جاسادىق، سىناق مەرزىمىنە اۋىستىردىق. الايدا، وكىنىشكە قاراي، سول ۋاقىت ىشىندە دە ادەبى وزگەرمەي، تاعى دا تۇتىنۋشىمەن ارازداسىپ قالدى. كەلەڭسىز وقيعالار قايتالاندى. ارتىنان شاعىم ءتۇسىپ جاتتى. سودان كەيىن، امال جوق، ەڭبەك شارتىن بۇزۋعا تۋرا كەلدى. كۋرەردىڭ جۇمىستان كەتۋىنە ءتىل ەمەس، مىنەز-قۇلقى سەبەپ بولدى – مۇنى ناقتى ايتىپ وتكىمىز كەلەدى"، – دەلىنگەن كومپانيانىڭ جازباسىندا.
