استانا پوليسيا دەپارتامەنتى ايەلىن ۇردى دەپ ايىپتالعان بۇرىنعى ديپلومات ساكەن ماماشقا قاتىستى قىلمىستىق ءىس بويىنشا تەرگەۋدىڭ ەگجەي-تەگجەيلەرىن ايتتى.
ۆەدومستۆونىڭ باسپا ءسوز قىزمەتى رەداكسيا ساۋالىنا بەرگەن جاۋابىندا، بىلتىر قۇقىق قورعاۋ ورگاندارى قازاقستاننىڭ ەلشىلىگىندەگى بۇرىنعى كەڭەسشىگە قاتىستى جۇبايىنا جۇيەلى تۇردە قول جۇمساۋ دەرەگى بويىنشا قىلمىستىق ءىس قوزعاعانىن ەسكە سالدى.
"پوليسيا تاراپىنان جەدەل-تەرگەۋ توبى قۇرىلىپ، وقيعانىڭ بارلىق ءمان-جايىن انىقتاۋ ءۇشىن قاجەتتى ساراپتامالار جۇرگىزىلدى. ايتارلىقتاي دالەلدەمەلەر جينالىپ، بەكىتىلدى"، – دەلىنگەن دەپارتامەنت حابارلاماسىندا.
تەرگەۋ ناتيجەسى بويىنشا تەرگەۋ سوتى كۇدىكتىگە قاتىستى "قاماۋعا الۋ" تۇرىندەگى بۇلتارتپاۋ شاراسىن تاڭداعان.
ەسكە سالساق، "نەمولچي.kz" قورىنىڭ پاراقشاسىندا باا-دەگى ەلشىلىكتىڭ كەڭەسشىسى ساكەن ماماش ايەلىن تۇراقتى تۇردە ۇرىپ-سوعاتىنى تۋرالى اقپارات پايدا بولدى. قازاقستان سىرتقى ىستەر مينيسترلىگى ديپلومات شۇعىل تۇردە ەلگە شاقىرىلاتىنىن ايتىپ جاۋاپ بەردى. كەيىن زورلىق-زومبىلىق تۋرالى حابارلاعان ەلشىلىك قىزمەتكەرىنىڭ جۇبايى دا باا-دەن قايتارىلاتىنى بەلگىلى بولدى. بۇل رەتتە ونى اۋەجايدا كۇيەۋىنىڭ تۋىستارى قارسى العانى ايتىلدى.
2024 جىلعى 28 ماۋسىمدا استانا قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى ساكەن ماماشقا قاتىستى دەنساۋلىققا قاساقانا جەڭىل زيان كەلتىرۋ دەرەگى بويىنشا ءىستى قارادى. سوت شەشىمى بويىنشا، ول كىنالى دەپ تانىلىپ، 15 تاۋلىككە اكىمشىلىك قاماققا الىندى.
پىكىر قالدىرۋ