بۇگىن ماجىلىستە كونستيتۋسيانىڭ 30 جىلدىعىنا وراي راقىمشىلىق جاريالاۋدى كوزدەيتىن زاڭ جوباسى قارالدى. قۇجاتتىڭ ەكىنشى بابىنا سايكەس، ەگەر قىلمىس ادامعا زيان كەلتىرمەسە نەمەسە كەلتىرىلگەن زالال تولىق وتەلسە، ورتاشا اۋىرلىقتاعى قىلمىس جاساعاندارعا راقىمشىلىق قولدانۋ قاراستىرىلعان. سونىمەن قاتار، اۋىر جانە اسا اۋىر قىلمىستار بويىنشا جازا مەرزىمىن قىسقارتۋ مۇمكىندىگى دە بار.
تالقىلاۋ بارىسىندا ءماجىلىس دەپۋتاتى ەرمۇرات باپي سىبايلاس جەمقورلىققا قاتىستى راقىمشىلىق ماسەلەسىن ناقتىلاۋدى سۇرادى.
– بىزدە جەمقورلىق دەگەن ءبىر دەرت بار. ولاردى راقىمشىلىققا جاتقىزامىز با؟ سەبەبى جەمقورلىقتىڭ ۇلكەن-كىشىسى بولمايدى. از مولشەردەگى نەمەسە تولىق جەمقورلىق دەپ ءبولۋدىڭ ءوزى دۇرىس ەمەس. بۇل قالاي جىكتەلەدى؟ – دەدى دەپۋتات.
وعان جاۋاپ بەرگەن ءماجىلىس دەپۋتاتى ابزال قۇسپان زاڭ جوباسىندا بۇل ماسەلەگە ناقتى شەكتەۋلەر قويىلعانىن اتاپ ءوتتى.
– زاڭ جوباسىنىڭ 4-بابىندا راقىمشىلىق قولدانىلمايتىن باپتار ناقتى كورسەتىلگەن. ولاردىڭ قاتارىندا سىبايلاس جەمقورلىق سيپاتىنداعى بارلىق قىلمىستار بار. قازىرگى تاڭدا باس بوستاندىعىنان ايىرۋ ورىندارىندا وسى سانات بويىنشا 624 ادام جازاسىن وتەپ جاتىر. ولاردىڭ ەشقايسىسىنا راقىمشىلىق قولدانىلمايدى، – دەدى ول.
