باس پروكۋروردىڭ ورىنباسارى اسەت شىندالييەۆ ءماجىلىستىڭ جالپى وتىرىسىنان كەيىن جۋرناليستەردىڭ سۇراعىنا جاۋاپ بەرىپ، LRT ىسىنە بايلانىستى ءنۇرالى الييەۆ پەن داريعا نازاربايەۆانىڭ تەرگەۋ وربيتاسىنا تارتىلۋ ىقتيمالدىعىنا قاتىستى پىكىر ءبىلدىردى.

— LRT ءىسى جونىندە بىزدە ەكى قىلمىستىق ءىس بار. بىرەۋى بويىنشا 5 جىل بۇرىن سوت ۇكىمى شىققان. ەكىنشىسى — تالعات اردانعا قاتىستى ءىس. ول قازىرگى ۋاقىتتا تۇركيادا قاماۋدا وتىر. ال ءسىز ايتىپ وتىرعان وزگە تۇلعالارعا قاتىستى مەندە ەشقانداي اقپارات جوق. بۇل تۋرالى باسقا قىلمىستىق قۋدالاۋ ورگاندارىنان سۇراۋ قاجەت، — دەدى شىندالييەۆ.

جۋرناليستەردىڭ سۇراعىنا سەبەپ بولعان – بۇعان دەيىنگى جۋرناليستىك زەرتتەۋلەردە LRT ىسىنە بايلانىستى داريعا نازاربايەۆا مەن ءنۇرالى الييەۆتىڭ ەسىمدەرىنىڭ ءجيى اتالۋى.

ەسكە سالا كەتەيىك، ۇلتتىق قاۋىپسىزدىك كوميتەتى LRT جوباسىن جۇزەگە اسىرۋ بارىسىندا مەملەكەتكە 85،9 ملرد تەڭگە كولەمىندە زالال كەلگەنىن مالىمدەگەن. اتالعان ءىس بويىنشا تالعات اردانعا حالىقارالىق ىزدەۋ جاريالانىپ، ول تۇركيا اۋماعىندا ۇستالعان بولاتىن.