اقتوبەدە كەڭەس وداعىنىڭ باتىرى ءاليا مولداعۇلوۆانىڭ 100 جىلدىق مەرەيتويى اياسىندا «مەن – ءاليامىن!» اتتى اۋقىمدى فورۋم ءوتتى. شاراعا ەسىمى باتىر قىزبەن اتتاس 300-گە جۋىق نازىك جان جينالدى.

وبلىس اكىمدىگىنىڭ مالىمەتىنشە، جيىنعا كەلگەندەردىڭ ەڭ ۇلكەنى – 88 جاستاعى قاريا، ال ەڭ كىشىسى – نەبارى 2 ايلىق ءسابي. تاڭعى ساعات 07:45-تە تاعى ءبىر ءاليا دۇنيەگە كەلگەنى دە فورۋمدا ەرەكشە اتاپ ءوتىلدى.

ستاتيستيكاعا سۇيەنسەك، بۇگىندە «ءاليا» ەسىمى 70 مىڭنان استام ازاماتشاعا بەرىلگەن. سونىڭ ىشىندە 4 مىڭعا جۋىعى اقتوبە وبلىسىندا تۇرادى.

فورۋمعا قاتىسۋشىلاردىڭ باسىم بولىگى – ءوز سالاسىندا جەتىستىككە جەتكەن دارىگەرلەر، مۇعالىمدەر، ونەر مەن سپورت سالاسىنىڭ ۇزدىكتەرى. جيىندا باتىر قىزدىڭ تۋعان كۇنىندە ومىرگە كەلگەن 4 ءاليا مەن بەيرەسمي تۇردە «ءاليا» دەپ اتالاتىن «ءىليا» ەسىمدى جاندار دا بولدى.

شارا اياسىندا ەرەكشە جەتىستىكتەرىمەن كوزگە تۇسكەن قاتىسۋشىلارعا قۇرمەت كورسەتىلدى. باتىردىڭ تۋعان كۇنىندە دۇنيەگە كەلگەندەرگە گۇل شوقتارى تارتۋ ەتىلىپ، جيىن سوڭىندا فورۋمعا قاتىسۋشىلار ءاليا مولداعۇلوۆانىڭ ەسكەرتكىشىنە گۇل قويدى.