قازاقستاندىقتاردىڭ جەكە دەرەكتەرىن ساتۋمەن اينالىسقان قىلمىستىق توپتىڭ جولى كەسىلدى
ىشكى ىستەر مينيسترلىگىنىڭ كيبەرقىلمىسپەن كۇرەس دەپارتامەنتى ۇلتتىق قاۋىپسىزدىك كوميتەتىمەن بىرلەسىپ، ازاماتتاردىڭ جەكە مالىمەتتەرىن ينتەرنەتتە زاڭسىز ساتۋمەن اينالىسقان قىلمىستىق توپتى اشكەرەلەپ، ونىڭ قىزمەتىن توقتاتتى.
مينيسترلىك وكىلدەرىنىڭ ايتۋىنشا، بۇل اقپاراتتار مەملەكەتتىك دەرەكتەر بازاسىنان زاڭسىز الىنعان جانە Telegram مەسسەندجەرى ارقىلى تاراتىلعان. مالىمەتتەر كەيبىر كوللەكتورلىق كومپانيالارعا دا بەرىلگەن.
ناتيجەسىندە:
-
140-تان استام ادام ۇستالدى، ونىڭ ىشىندە كومپانيا باسشىلارى مەن Telegram ارنا اكىمشىلەرى بار؛
-
5 كۇدىكتى قاماۋعا الىندى؛
-
400-دەن استام كومپيۋتەر مەن ەلەكتروندى قۇرىلعىلار تاركىلەندى.
قازىرگى تاڭدا قىلمىستىق كودەكستىڭ بىرنەشە بابى بويىنشا تەرگەۋ ءجۇرىپ جاتىر:
-
205-باپ (اقپاراتتىق جۇيەگە زاڭسىز قول جەتكىزۋ)،
-
147-باپ (جەكە ومىرگە قول سۇعۋ، جەكە دەرەكتەر زاڭناماسىن بۇزۋ)،
-
211-باپ (شەكتەۋلى ەلەكتروندىق اقپاراتتاردى زاڭسىز تاراتۋ).
كيبەرقىلمىسپەن كۇرەس دەپارتامەنتىنىڭ باستىعى جاندوس ءسۇيىنبايدىڭ مالىمدەۋىنشە، قىلمىسقا قاتىسى بار بارلىق تۇلعالار انىقتالىپ جاتىر.
ىشكى ىستەر مينيسترلىگى ازاماتتاردىڭ جەكە دەرەكتەرىن قورعاۋ جانە سيفرلىق قاۋىپسىزدىكتى قامتاماسىز ەتۋ باعىتىندا جۇيەلى جۇمىستاردى جالعاستىرۋدا.