قازاقستاندا بۇرىنعى جوعارى لاۋازىمدى شەنەۋنىكتەر مەن «ءبىرىنشى كرەديتتىك بيۋرو» باسشىسى پارا بەرۋ ءىسى بويىنشا تەرگەۋگە الىندى. بۇل تۋرالى قارجىلىق مونيتورينگ اگەنتتىگى حابارلادى.
28 ماۋسىم كۇنى ءۇش كۇدىكتى كەزەكتى پارا بەرۋ كەزىندە قىلمىس ۇستىندە ۇستالدى. بۇل جولى بەرىلگەن سوما - 75 مىڭ اقش دوللارى، ياعني شامامەن 39 ميلليون تەڭگە. اگەنتتىك پارا بەرۋ پروسەسىنىڭ ناقتى ۆيدەوكادرلارىن جاريالادى.
كۇدىكتىلەردىڭ ۇيلەرىندە جۇرگىزىلگەن ءتىنتۋ بارىسىندا قوسىمشا 370 مىڭ دوللار مەن 4،5 ميلليون تەڭگە تابىلعان. قازىرگى تاڭدا بارلىق كۇدىكتىلەر ەكى اي مەرزىمگە قاماۋعا الىندى.
الماتى قالاسى بويىنشا قارجىلىق مونيتورينگ دەپارتامەنتى «ەڭبەك رەسۋرستارىن دامىتۋ ورتالىعى» اق مەن «ءبىرىنشى كرەديتتىك بيۋرو» ج ش س باسشىلارىنا قاتىستى سوتقا دەيىنگى تەرگەۋدى باستادى. تەرگەۋ دەرەكتەرىنە سايكەس، پكب باسشىلىعى قارجى ۇيىمدارىنىڭ سۇرانىستارىن وڭدەۋ كەزىندە اقپاراتتىق قىزمەتتەر كورسەتۋگە بايلانىستى ءوز مۇددەلەرىن وتكىزۋ ءۇشىن جۇيەلى تۇردە پارا بەرىپ وتىرعان.
ءىس بويىنشا نەگىزگى كۇدىكتىلەر:
- رۋسلان وماروۆ – «ءبىرىنشى كرەديتتىك بيۋرونىڭ» قازىرگى باس ديرەكتورى؛
- داۋلەت ارعاندىقوۆ – بۇرىنعى دەنساۋلىق ساقتاۋ جانە الەۋمەتتىك دامۋ ۆيسە-مينيسترى؛
- ءاقمادي سارباسوۆ – بۇرىنعى ەڭبەك جانە حالىقتى الەۋمەتتىك قورعاۋ ۆيسە-مينيسترى.
تەرگەۋ امالدارى جالعاسىپ جاتىر.
