تۇركىستان وبلىسىنا قاراستى شاردارا اۋدانىندا اقىن ءامىرحان بالقىبەككە ارنالعان ەسكەرتكىش ورناتىلدى. ەسكەرتكىش اۋدان ورتالىعىنداعى ساياباقتا ورنالاسقان. 

ءامىرحان بالقىبەك 1969 جىلى قازىرگى شاردارادا دۇنيەگە كەلگەن. 1995 جىلى ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. 1995-2000 جىلدارى «پاراسات» جۋرنالىندا، «جاس الاش»، «انا ءتىلى» گازەتتەرىندە ءتىلشى، 2000-2004 جىلدارى «قازاق ادەبيەتى» گازەتىندە ءبولىم مەڭگەرۋشىسى قىزمەتتەرىن اتقارعان.

«جاس قازاق» گازەتىندە ءبولىم رەداكتورى بولىپ ىستەگەن. ولەڭدەرى «اۋىلدان ۇشقان اققۋلار»، «تولقىننان تولقىن تۋادى» ۇجىمدىق جيناقتارىنا ەنگەن. «مەتامورفوزا»، «سىنعان ساۋلەنىڭ شاعىلىسۋى»، «قاسقىر قۇداي بولعان كەز»، «اقىن اپوللوگياسى» جىر جيناقتارىنىڭ اۆتورى. اقىن 2014 جىلدىڭ 8 ساۋىرىندە قايتىس بولدى. حالىقارالىق «شابىت» فەستيۆالىندە ءامىرحان بالقىبەك اتىنداعى جۇلدە بەرىلەدى.