ق ر پارلامەنتى ءماجىلىسىنىڭ دەپۋتاتى ەرمۇرات باپي ەلىمىزدە ءجيى ايتىلاتىن «پرەزيدەنت ىشكى ماسەلەلەردى ىسىرىپ قويىپ، سىرتقى ساياساتقا كوبىرەك كوڭىل بولەدى» دەگەن پىكىرلەردى سىنعا الدى. ونىڭ ايتۋىنشا، مۇنداي ۋاجدەر بيلىك جۇيەسىنىڭ قالاي جۇمىس ىستەيتىنىن تولىق تۇسىنبەيتىندەردىڭ ءسوزى.
«قازىرگى الەم الاساپىران جاعدايدى باستان كەشىپ جاتىر. جاھاندىق ساياسات كۇن سايىن قۇبىلادى. اقش پەن جۇڭگو اراسىنداعى ستراتەگيالىق تۇرعىدا باسەكە كۇشەيدى. تاياۋ شىعىستا جاعداي ۋشىعىپ تۇر. رەسەيگە سالىنعان الەمدىك سانكسيالاردىڭ سالقىنى كورشى ەلدەرگە ءتيىپ جاتىر. وسىنداي قيىن زاماندا سىرتقى ساياسات – ەل قاۋىپسىزدىگىن قامتاماسىز ەتۋدىڭ بىردەن-بىر تەتىگى»، - دەيدى دەپۋتات.
ەرمۇرات باپي قازاقستاننىڭ گەوساياسي ورنىن دا ەسكە سالدى:
«ءبىز ەكى الپاۋىت – رەسەي مەن قىتايدىڭ اراسىندا ورنالاسقان ەلمىز. الەم بويىنشا 9ورىندا تۇرعان ۇلان-عايىر جەرىمىز، باي تابيعي رەسۋرسىمىز بار. ال حالقى – سالىستىرمالى تۇردە از مەملەكەتپىز. ياعني، قازاقستان – گەوساياسي تۇرعىدا وتە ماڭىزدى، ءبارىنىڭ نازارىندا تۇرعان مەملەكەت. سوندىقتان پرەزيدەنتتىڭ شەتەلدەرمەن تەڭ دارەجەدە ساليقالى ءارى بەلسەندى قارىم-قاتىناس جۇرگىزۋى – تاۋەلسىزدىگىمىز بەن تىنىشتىعىمىزدىڭ كەپىلى»، - دەيدى ماجىلىسمەن.
ماقالادا ول قاسىم-جومارت توقايەۆتىڭ بەلسەندى سىرتقى ساياساتىمەن قاتار، ىشكى رەفورمالار مەن الەۋمەتتىك ماسەلەلەردى دە قاتار الىپ جۇرگەنىن ناقتى دەرەكتەرمەن كورسەتكەن. مىسالى، سوڭعى ەكى ايدا پرەزيدەنت 18 رەسمي ءىس-شاراعا قاتىسىپ، 23 ادامدى قابىلداپ، 31 زاڭعا قول قويىپ، وڭىرلەردى ارالاپ، حالىقپەن كەزدەسكەن. سونىمەن قاتار، وسى ارالىقتا ءتورت رەت شەتەلگە ساپار جاساپ، ءۇش حالىقارالىق سامميتكە قاتىسىپ، ونداعان ماڭىزدى قۇجاتتارعا قول قويعان.
«توقايەۆ ۇلكەن ەلدىڭ ءبىر ايماعىن باسقارىپ وتىرعان جوق، ول – گەوساياسي احۋال مىڭ قۇبىلعان زاماندا تاۋەلسىز مەملەكەتتىڭ قاۋىپسىزدىگىن، ەگەمەندىگى مەن اۋماقتىق تۇتاستىعىن ساقتاۋعا جاۋاپتى تۇلعا. ونى بەلسەندى، پراگماتيكالىق جانە سارابدال سىرتقى ساياساتسىز جاساۋ مۇمكىن ەمەس. ءاربىر حالىقارالىق كەزدەسۋ، ءار سامميت، پرەزيدەنتتىڭ ساپارلارى – وسى باستى مۇددەلەردى قورعاۋعا باعىتتالعان قادامدارى. قيىن كەزەڭدە ول ىرگەلەس ەلدەرمەن دە، ەۋرووداق مۇشەلەرىمەن دە، يسلام – اراب الەمىمەن، تۇركى مەملەكەتتەرىمەن، ءتىپتى الىس امەريكا قۇراما شتاتتارىمەن دە تۇراقتى ءارى ءوزارا ءتيىمدى قارىم-قاتىناستى ساقتاپ وتىر. ءدال ءقازىر دە جانە بولاشاقتا دا بىزگە وسىنداي باسشى قاجەت»، - دەپ تۇيىندەيدى ەرمۇرات باپي.
