قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى.
جيىندا ىشكى جانە سىرتقى كوشى-قون سالاسىنداعى نەگىزگى ۇردىستەر قاراستىرىلىپ، پرەمەر-مينيستردىڭ ورىنباسارى ەرمەك كوشەربايەۆتىڭ، سونداي-اق ىشكى ىستەر، سيفرلىق دامۋ، يننوۆاسيالار جانە اەروعارىش ونەركاسىبى، ەڭبەك جانە حالىقتى الەۋمەتتىك قورعاۋ مينيسترلەرىنىڭ اقپاراتى تىڭدالدى.
مەملەكەت باسشىسى كوشى-قون ساياساتىن ىسكە اسىرۋدا گەوساياسي فاكتورلار مەن سىن-قاتەرلەردى، دەموگرافيالىق بولجامداردى جانە حالىقتىڭ كوشۋ سەبەپتەرىن ەسەپكە الۋدىڭ ماڭىزىنا توقتالدى.
پرەزيدەنت زاڭسىز كوشى-قوندى بولدىرماۋ بويىنشا باقىلاۋدى قامتاماسىز ەتۋ، سونداي-اق ەلدىڭ ادامي كاپيتالىن ارتتىرۋدى ىنتالاندىرۋ قاجەتتىگىنە نازار اۋداردى.
ايتا كەتەرلىگى رەسەيدىڭ ۋكرايناعا سوعىسىنان كەيىن قازاقستانعا اعىلعان ورىستار سانى ءجۇز مىڭداپ ارتقان. ەسەسىنە ەلدەگى ەكونوميكالىق داعدارىس پەن كوشى-قون ساياساتىنىڭ دۇرىس جۇرگىزىلمەۋى سالدارىنان شەتەلدەگى قازاقتاردىڭ ەلگە ورالۋى جانە سولتۇستىك وبلىستارعا باعىتتالعان «قازاق كوشىنىڭ» قارقىنى باياۋلاعانى ءجيى ايتىلادى. بۇعان «ساياحاتشى» اتاۋىمەن كەلىپ جاتقان مىڭداعان قىتايلاردى قوسىڭىز.
توقايەۆ وتكىزگەن كەزەكتى قاۋىپسىزدىك كەڭەسىنىڭ وتىرىسى وسى ماسەلەلەرگە باسا نازار اۋدارا ما؟ ونى الداعى ناتيجە كورسەتەدى.
