«ەل داۋىسى» قوعامدىق قورى 2026 جىلعى 15 ناۋرىزدا قازاقستاندا وتكەن رەسپۋبليكالىق رەفەرەندۋمدى تاۋەلسىز قوعامدىق باقىلاۋدىڭ قورىتىندىلارىنا ارنالعان اشىق باسپا ءسوز كونفەرەنسياسىن وتكىزدى.
كەزدەسۋ اياسىندا قور باسشىلىعى داۋىس بەرۋ كۇنى بايقاۋشىلار جەلىسىنىڭ جۇمىسى تۋرالى ايتىپ، باقىلاۋدىڭ الدىن الا ناتيجەلەرىن ۇسىندى، سونداي-اق سايلاۋ ۋچاسكەلەرىندەگى داۋىس بەرۋ پروسەسىن ۇيىمداستىرۋعا قاتىستى نەگىزگى قورىتىندىلارمەن ءبولىستى.
«“ەل داۋىسى” قورى 2020 جىلدان بەرى جۇمىس ىستەپ كەلەدى. وسى كەزەڭدە ءبىز 6 مىڭنان استام بايقاۋشىنى وقىتىپ، دايارلادىق. بۇگىنگە دەيىنوتكەن بارلىق ەلەكتورالدىق پروسەستەرگە، سونىڭ ىشىندە پارلامەنتتىك جانە پرەزيدەنتتىك سايلاۋلارعا قاتىستىق. رەفەرەندۋمدى باقىلاۋ تاجىريبەمىز دە بار. بيىل رەفەرەندۋم وتەتىنى جاريالانعان ساتتەن باستاپ ءبىز بىردەن ءۇن قاتىپ، اككرەديتتەۋ مەرزىمى جىل سوڭىندا اياقتالعاندىقتان، ونى جاڭارتىپ، تاۋەلسىز باقىلاۋدى ۇيىمداستىرۋعا كىرىستىك. سونىمەن قاتار، بيىل 2020 جىلدان بەرى بىزبەن تۇراقتى جۇمىس ىستەپ كەلە جاتقان بايقاۋشىلار پۋلىنىڭ قالىپتاسۋىنىڭ ارقاسىندا باقىلاۋ گەوگرافياسىن كەڭەيتە الدىق. ولاردىڭ تاجىريبەسىنىڭ ارقاسىندا بىزگە جاڭا قاتىسۋشىلار قوسىلدى. بۇدان بولەك، جاڭا بايقاۋشىلار الەۋمەتتىك جەلىلەر ارقىلى ماعان تىكەلەي حابارلاستى»، – دەدى قور جەتەكشىسى ايدا جەكسەن.
ونىڭ ايتۋىنشا، بيىل قوردىڭ قوعامدىق باقىلاۋ جوباسى قازاقستاننىڭ 32 قالاسىن قامتىدى. ولاردىڭ قاتارىندا ءىرى وڭىرلىك ورتالىقتارمەن قاتار شاعىن قالالار دا بار. قور بايقاۋشىلارى استانا، الماتى، شىمكەنت، قاراعاندى، پاۆلودار، وسكەمەن، قوستاناي، اقتاۋ، اتىراۋ، تاراز، تۇركىستان، پەتروپاۆل، قىزىلوردا قالالارىندا، سونداي-اق ەكىباستۇز، جەزقازعان، ساتبايەۆ، كەنتاۋ، تالعار، قونايەۆ، ستەپنوگورسك، ريددەر جانە وزگە دە ءبىرقاتار ەلدى مەكەندەردە جۇمىس ىستەدى.
ايدا جەكسەن داۋىس بەرۋ كۇنى بويى قور بايقاۋشىلارى ۋچاسكەلەردىڭ اشىلۋىن، داۋىس بەرۋ پروسەسىنىڭ ۇيىمداستىرىلۋىن، ۋچاسكەلەردەگى راسىمدەردىڭ ساقتالۋىن، كوميسسيالاردىڭ جۇمىسىن، سونداي-اق داۋىستاردى ساناۋ مەن قورىتىندى قۇجاتتاردى راسىمدەۋ پروسەسىن تىركەپ وتىرعانىن اتاپ ءوتتى.
ۋچاسكەلەردەن تۇسكەن اقپارات وڭىرلىك ۇيلەستىرۋشىلەر ارقىلى جەتكىزىلىپ، قوردىڭ ورتالىق شتابىندا جيناقتالدى.
الدىن الا باقىلاۋ ناتيجەلەرى بويىنشا، ۋچاسكەلەردىڭ باسىم بولىگىندە داۋىس بەرۋ ۇيىمداسقان ءارى تىنىش جاعدايدا ءوتتى.
باقىلاۋ بارىسىندا راسىمدىك سيپاتتاعى جەكەلەگەن ەسكەرتۋلەر مەن سيگنالدار تىركەلدى، الايدا ولاردىڭ ناتيجەگە ەلەۋلى اسەرى جوق.
قور جەتەكشىسى ايدا دجەكسەنوۆا ازاماتتاردىڭ قوعامدىق باقىلاۋعا بەلسەندى قاتىسۋ دەڭگەيى جوعارى بولعانىن اتاپ ءوتتى:
«قازاقستاندا ازاماتتىق باقىلاۋعا دەگەن قىزىعۋشىلىقتىڭ ارتىپ كەلە جاتقانىن كورىپ وتىرمىز، مۇنى كەلۋشىلەر بەلسەندىلىگىنەن دە بايقاۋعا بولادى. داۋىس بەرۋ كۇنى ءبىزدىڭ بايقاۋشىلار ەلىمىزدىڭ ءارتۇرلى قالالارىندا جۇمىس ىستەپ، ۋچاسكەلەردەگى جاعدايدى تىركەپ، اقپاراتتى قور شتابىنا جىبەرىپ وتىردى. ءبىز ءۇشىن ادامداردىڭ قوعامدىق پروسەستەرگە قاتىسۋعا جانە راسىمدەردىڭ اشىقتىعى ءۇشىن جاۋاپكەرشىلىك الۋعا دايىن بولۋى ماڭىزدى»، – دەدى ول.
قور جەتەكشىسى قوعامدىق باقىلاۋدىڭ نەگىزگى ميسسياسى راسىمدەردىڭ اشىقتىعىن قامتاماسىز ەتۋ جانە زاڭنامانىڭ ساقتالۋىن قاداعالاۋ ەكەنىن اتاپ ءوتتى.
