الماتىدا وتكەن رەفەرەندۋم كەزىندە سونشالىقتى زاڭبۇزۋشىلىق تىركەلگەن جوق، داۋىس بەرۋدى ۇيىمداستىرۋ ايتارلىقتاي جاقسارعانىن بايقادىق. جازۋشى، ەكونوميست ءارى قوعام قايراتكەرى بەكنۇر قيسىقوۆ وسىلاي دەپ وتىر. ول تاۋەلسىز باقىلاۋشىلاردى وقىتىپ، ءوزى دە قالاداعى داۋىس بەرۋ بارىسىن باقىلاپتى.
ونىڭ ايتۋىنشا، رەفەرەندۋمدى باقىلاۋعا قازاقستان بويىنشا «حالىق ءۇنى» قوعامدىق بىرلەستىگىنەن دايىندىقتان وتكەن ەرىكتىلەر ەكەن.
«بۇكىل قازاقستان بويىنشا ءبىزدىڭ كواليسيا مەن باستاما اياسىندا شامامەن ەكى مىڭداي ادام بايقاۋشى رەتىندە قاتىستى. بۇلار اقشا ءۇشىن ەمەس، ءوز ەركىمەن كەلگەن جاستار بولاتىن. سەبەبى ولار ەل ومىرىندەگى وسى ماڭىزدى كەزەڭگە قاتىسقىسى كەلدى. ءبىز ولارعا ترەنينگر وتكىزىپ، بايقاۋ ەرەجەلەرى مەن قۇقىقتىق نورمالاردى تۇسىندىردىك. ناتيجەسىندە ولار جەتكىلىكتى جوعارى دايىندىق پەن كاسىبيلىك دەڭگەيىن كورسەتتى»، – دەدى بەكنۇر قيسىقوۆ.
ول ەلدىڭ ءار وڭىرىندە سايلاۋشىلاردىڭ قاتىسۋ بەلسەندىلىگى ايتارلىقتاي ايىرماشىلىق كورسەتكەنىن اتاپ ءوتتى. كەيبىر وبلىستا ول 87–90%-عا دەيىن جەتسە، الماتىدا شامامەن 33% بولعان.
«العاش قاراعاندا 33% از بولىپ كورىنۋى مۇمكىن. ءبىراق قالانىڭ ۇلكەن ەكەنىن دە ەسكەرۋ كەرەك: مۇندا ادامدار ءموبيلدى ءارى ساياسي پروسەستەرگە كوزقاراسى باسقاشا بولۋى مۇمكىن. سوندىقتان الماتى ءۇشىن بۇل كورسەتكىش تە ماڭىزدى دەپ ايتۋعا بولادى»، – دەپ ءتۇسىندىردى.
بەكنۇر قيسىقوۆتىڭ ايتۋىنشا، باقىلاۋشىلار جەكەلەگەن داۋلى جاعدايلاردى تىركەگەن. كوبىنە ولار ۋچاسكەدەگى ونلاين-ترانسلياسيالار، بيۋللەتەندەردى سۋرەتكە ءتۇسىرۋ نەمەسە داۋىس بەرەتىن كۇنى الەۋمەتتىك جەلىدە ۇگىت جازۋ سياقتى نارسەلەر بولعان.
«ءقازىر بلوگەرلەر مەن الەۋمەتتىك جەلىنىڭ بەلسەندىلەرى كەيدە ۋچاسكەنىڭ وزىندە ءوز پوزيسياسىن بىلدىرۋگە تىرىسادى. كەيبىر ادامدار بيۋللەتەندى سۋرەتكە ءتۇسىرىپ، ينتەرنەتكە جاريالاعان جاعدايلار بولدى، الايدا بۇعان تىيىم سالىنعان. سونداي-اق ونلاين-ترانسلياسيالار بويىنشا دا داۋلار تۋىندادى: زاڭدا بۇل ناقتى جازىلماعانىمەن، مۇنداي ارەكەت داۋىس بەرۋ قۇپياسىنا كەدەرگى كەلتىرۋى مۇمكىن دەگەن ەرەجە بار. سوندىقتان وسى ماسەلەلەر توڭىرەگىندە ءبىراز كەلىسپەۋشىلىك بولدى»، – دەيدى ول.
بەكنۇر قيسىقوۆتىڭ سوزىنشە، الماتىدا باقىلاۋشىلار بيۋللەتەندەردى جاپپاي تاستاۋ سياقتى ەلەۋلى زاڭبۇزۋشىلىقتى تىركەمەگەن. سايلاۋدى ۇيىمداستىرۋ جاعى جەتىلىپ كەلە جاتىر.
«الدىڭعى ناۋقانمەن سالىستىرساق، ۇيىمداستىرۋ دەڭگەيى ارتقان. ۋچاسكەلەردە اقپاراتتىق ستەندتەر، بايلانىس دەرەكتەرى، سحەمالار، جاشىكتەردىڭ ورنالاسۋى - ءبارى ستاندارتقا ساي راسىمدەلگەن. ءتىپتى ماتەريالداردىڭ گەومەترياسى مەن ورنالاستىرىلۋى سياقتى ۇساق-تۇيەككە دەيىن كاسىبي جاسالعان. جالپى العاندا، داۋىس بەرۋ تىنىش ءوتتى»، – دەپ قوستى بەكنۇر قيسىقوۆ.
