اقش پرەزيدەنتى دونالد ترامپ قىتايدى قوسپاعاندا، الەم ەلدەرىنىڭ تاۋارلارىنا بۇعان دەيىن جاريالاعان باج سالىعىن 90 كۇنگە توقتاتتى.

بۇل تۋرالى امەريكا پرەزيدەنتى Truth Social-دا جازدى. ول جۇڭگو بىردەن كۇشىنە ەنەتىن، 125 پايىز كولەمىندەگى كەدەندىك باج سالىعىنىڭ جوعارى مولشەرلەمەسىنە ۇشىرايتىنىن جەتكىزدى.

ونىڭ ايتۋىنشا، بۇل قادام "قىتايدىڭ الەمدىك نارىققا كورسەتكەن قۇرمەتسىزدىگىنەن" تۋىنداعان.

ترامپ الەمنىڭ 75-تەن اسا ەلى اقش-تى ساۋدا جانە ساۋدا كەدەرگىلەرى بويىنشا كەلىسسوز جۇرگىزۋگە شاقىرعانىن جانە امەريكا قۇراما شتاتتارىنا قارسى ەشقانداي ارەكەت جاساماعانىن مالىمدەدى. ول قانداي ەلدەر ءۇشىن باج سالىعى توقتاتىلاتىنىن ناقتىلامادى.

اق ءۇي اقش-تىڭ بارلىق دەرلىك يمپورتىنا 10 پايىز كولەمىندەگى باج سالىعى كۇشىندە قالاتىنىن مالىمدەدى. بۇل حابارلاندىرۋ ءقازىردىڭ وزىندە بار، كولىككە، بولات پەن اليۋمينييگە سالىناتىن باج سالىعىنا اسەر ەتپەيتىن سەكىلدى.

ايتا كەتەيىك، جۋىردا جۇڭگو اقش-قا جاۋاپ رەتىندە تاريف جاريالاپ، تاۋارلارعا جالپى باج سالىعىن 84 پايىزعا جەتكىزگەن بولاتىن.