مەملەكەت باسشىسى 2025 جىلعى 10 ساۋىردە عىلىم كۇنى قارساڭىنداعى عالىمدارمەن كەزدەسۋىندە الەمدە جاساندى ينتەللەكت تەحنولوگيالارى قارقىندى دامىپ كەلە جاتقانىنا توقتالدى.
توقايەۆ جاساندى ينتەللەكت سالاسىندا قازاقستاننىڭ الدىڭعى قاتاردان كورىنۋىنە تولىق مۇمكىندىگى بار ەكەنىن ايتتى.
"ادام كاپيتالى – ەلىمىزدىڭ بۇل باعىتتا اتقاراتىن جۇمىسىنىڭ باستى كەپىلى. ياعني تالانتتى جانە ءبىلىمدى ازاماتتارعا ارقا سۇيەيمىز. سوندىقتان ءىت ماماندارىن دايارلاۋدى كۇشەيتىپ، وقۋشىلار مەن ستۋدەنتتەرگە جاساندى ينتەللەكت داعدىلارىن ۇيرەتەمىز. وتاندىق عىلىمدا مۇنداي كەلەشەگى زور باعىتتار كوپ. جالپى، عىلىمنىڭ جۇيەلى دامۋى ءۇشىن مەملەكەت پەن بيزنەس، ۋنيۆەرسيتەتتەر مەن عىلىمي ورتالىقتار كۇش بىرىكتىرۋى قاجەت، – دەدى قاسىم-جومارت توقايەۆ.
مۇنىمەن قوسا، وتاندىق عىلىمنىڭ الدىندا تۇرعان ءبىرقاتار ماڭىزدى مىندەتكە نازار اۋداردى.
"ستراتەگيالىق مىندەتتەردىڭ ءبىرى – يادرولىق عىلىم مەن تەحنولوگيانى دامىتۋ. بۇل سالادا قازاقستاننىڭ الەۋەتى زور. الماتىداعى يادرولىق فيزيكا ينستيتۋتى مەن كۋرچاتوۆتاعى ۇلتتىق يادرولىق ورتالىق سياقتى الدىڭعى قاتارلى عىلىمي مەكەمەلەر ىرگەلى جانە قولدانبالى زەرتتەۋلەر جۇرگىزىپ، ماماندار دايارلاپ كەلەدى. اتوم ەنەرگياسىن ءوندىرۋ – تۇراقتى ەنەرگيا كوزى عانا ەمەس، ەكونوميكا مەن عىلىمنىڭ جاڭا باعىتتارىن دامىتۋدىڭ نەگىزگى كىلتى. بۇل رەتتە يادرولىق مەديسينا، سۋتەگى ەنەرگياسى، سۋدى تۇشىتۋ، سينتەتيكالىق وتىن ءوندىرۋ، شاعىن ءمودۋلدى رەاكتورلار جانە تاعى باسقالارى تۋرالى ءسوز بولىپ وتىر. وسى باعىتتا زور تابىسقا جەتۋ ءۇشىن زەرتتەۋ ينفراقۇرىلىمىن نىعايتۋ، عىلىمي جۇمىستى كۇشەيتۋ، ينجەنەرلىك ءبىلىم بەرۋدى جاڭعىرتۋ قاجەت. پرەزيدەنت جانىنداعى عىلىم جانە تەحنيكا جونىندەگى ۇلتتىق كەڭەستىڭ الداعى وتىرىسىندا اتوم ەنەرگەتيكاسىن دامىتۋ كۇن تارتىبىندەگى باستى ماسەلە بولۋعا ءتيىس. سونداي-اق مەن ۇلتتىق قۇرىلتايدا عىلىم قالاشىقتارىن قۇرۋ ماسەلەسىن كوتەردىم. ۇلتتىق كەڭەس وسى جۇمىسقا ايرىقشا نازار اۋدارۋى قاجەت، – دەدى پرەزيدەنت.
