قازاقستاندا ياندەكس.تاكسيدىڭ باعا قالىپتاستىرۋ جۇيەسىنە قاتىستى تەكسەرىستەن كەيىن، كومپانياعا تاريفتەردى نەگىزسىز وسىرۋگە تىيىم سالىندى. ءاۋديتتى باسەكەلەستىكتى قورعاۋ جانە دامىتۋ اگەنتتىگى مەن سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى بىرلەسىپ جۇرگىزگەن.

مينيسترلىكتىڭ حابارلاۋىنشا، باعا الگوريتمىندە تۇتىنۋشىلارعا تەرىس اسەر ەتۋى مۇمكىن ءبىرقاتار تاۋەكەل انىقتالعان. ولاردىڭ ءبىر بولىگى جويىلسا، قالعانى بويىنشا ياندەكس مىندەتتەمەلەر الدى.

كومپانيا ەنگىزۋگە كەلىسكەن نەگىزگى وزگەرىستەر:

تاريفتەر مەن بازالىق قۇندى كوتەرەر الدىندا 3 كۇن بۇرىن ەسكەرتۋ؛

اۋەجاي تاريفتىك ايماعىنان كەيبىر تۇرعىن اۋدانداردى شىعارۋ؛

جۇرگىزۋشىلەردىڭ تابىسىن ازايتپاۋ ءۇشىن جول قۇنىنىڭ ەكى ەسەسىنەن ارتىق كوميسسيا ۇستاماۋ؛

«ەكونوم» تاريفىندەگى كوميسسيانى ەكى جىلدا ءبىر رەتتەن ءجيى كوتەرمەۋ؛

ماكسيمالدى سۇرانىس كەزىندە ءتاريفتى 3 ەسەدەن ارتىق وسىرمەۋ (بۇل شەكتەۋ ءار توقسانداعى ساپارلاردىڭ 5%-ىنان اسپاۋى ءتيىس)؛

ساپار باعاسىنىڭ تولىق قۇرىلىمىن 2025 جىلدىڭ 30 ماۋسىمىنا دەيىن قوسىمشادا اشىق كورسەتۋ؛

تەحقولداۋدىڭ تيىمدىلىگىن ارتتىرۋ.

سونىمەن قاتار، سۇرانىس شەكتەن تىس ارتقان ساتتەردە «ەكونوم» تاريفىنە ۆيرتۋالدى كەزەك جۇيەسى ەنگىزىلەدى. بۇل ارقىلى پايدالانۋشىلار تاكسي سۇراپ تۇرعان ادامداردىڭ سانىن كورىپ، نە كۇتۋ، نە باسقا ءتاريفتى تاڭداۋ، نە قوعامدىق كولىككە وتىرۋ شەشىمىن وزدەرى قابىلداي الادى.

ياندەكس بۇدان بىلاي جەڭىلدىكتەر باعدارلاماسىنىڭ شىعىندارىن تولىق ءوزى وتەيدى. بۇل وزگەرىستەر پايدالانۋشىلاردىڭ قۇقىقتارىن قورعاپ، ءادىل نارىق قالىپتاستىرۋعا باعىتتالعان.