"قازمۇنايگاز" اراب كومپانياسىمەن كاسپيي تەڭىزى ءۇشىن كونتەينەرلىك كەمەلەر سالۋ تۋرالى ۋاعدالاستى.

1 مامىردا ابۋ-دابيدە (ءباا) "قازمۇنايگاز" باسقارما ءتوراعاسى اسحات حاسەنوۆ AD ports Group باس ديرەكتورى مۇحاممەد ءال شاميسيمەن كەزدەستى. كەزدەسۋ بارىسىندا تاراپتار ترانسكاسپيي حالىقارالىق كولىك باعىتىندا كونتەينەرلىك تاسىمالداۋ كولەمىنىڭ وسۋىنە بايلانىستى كاسپيي تەڭىزى ءۇشىن كونتەينەرلىك كەمەلەر سالۋ جونىندە كەلىسسوزدەر جۇرگىزدى.

"AD ports Group ەكى زاماناۋي كونتەينەرلىك كەمەنى سالۋ تۋرالى ينۆەستيسيالىق شەشىم قابىلدادى. ايتا كەتۋ كەرەك، كەمەنىڭ جوباسى قمگ جانە AD Ports Group – پەن بىرلەسىپ ازىرلەندى جانە ونىڭ كونتەينەرلىك سىيىمدىلىعى كاسپيي تەڭىزى ءۇشىن رەكوردتىق بولادى"، - دەپ حابارلايدى كومپانيانىڭ باسپا ءسوز قىزمەتى.

قمگ مەن AD Ports Group اراسىنداعى ىنتىماقتاستىق كاسپيي تەڭىزى مەن اشىق تەڭىزدەر ءۇشىن تانكەر جانە ساۋدا فلوتىن دامىتۋ، وففشورلىق جوبالاردى قولداۋ ءۇشىن فلوت قۇرۋ سياقتى باعىتتاردى قامتيدى.