استانا قالاسىنداعى ورىنبور كوشەسىندە ورنالاسقان Envy اتتى ۆەلوسيپەد ساتاتىن دۇكەندە مەملەكەتتىك تىلدە قىزمەت سۇراعان انا مەن قىزىنا ساتۋشىنىڭ دورەكىلىك تانىتۋى الەۋمەتتىك جەلىدە كەڭ رەزونانس تۋدىردى.

وقيعانى جۋرناليست كامشات تاسبولات Facebook پاراقشاسىندا جاريالاعان. ول 6 جاسار قىزىمەن ۆەلوسيپەد ىزدەپ كەلگەن. بالا ورىسشا سانداردى تۇسىنبەگەن سوڭ، جۋرناليست ساتۋشىدان ۆەلوسيپەد باعاسىن قازاق تىلىندە ايتۋىن سۇراعان. الايدا ساتۋشىنىڭ رەاكسياسى شەكتەن شىققان.

"ءقازىر تاياق جەيسىڭ! پرەزيدەنت نە دەگەنىن ەستىمەدىڭ بە؟ سەندەيلەردى جازاعا تارتادى!" – دەپ ايقايلاعان ساتۋشى.
ءجۋرناليستتىڭ ايتۋىنشا، ساتۋشى كىشكەنتاي قىزدى "ۇلتشىل" دەپ تە كەمسىتكەن.

ساتۋشىنىڭ اشىق اگرەسسياسىنان كەيىن اناسى نارازىلىق بىلدىرمەك بولعانىمەن، قىزمەتكەر ەشتەڭە بولماعانداي، باسقا تۇتىنۋشىلارعا بۇرىلىپ كەتكەن.
"قىزىم قاتتى قورقىپ، ويىنشىقتاردىڭ اراسىنا تىعىلدى. وسىنداي جاعدايلاردان كەيىن بالالار پسيحولوگياسىندا جارا قالادى. بۇرىن "بۇجايمەن" قورقىتۋشى ەدى، ەندى پرەزيدەنتپەن قورقىتاتىن بولعان با؟" – دەپ جازادى كامشات تاسبولات.

جۋرناليست دۇكەندە كورنەكى اقپاراتتىڭ تەك ورىس جانە اعىلشىن تىلدەرىندە ەكەنىن دە بايقاعان. بۇل – زاڭبۇزۋشىلىق.

قازاقستان رەسپۋبليكاسىنىڭ "ءتىل تۋرالى" زاڭىنىڭ 21-بابىنا جانە "جارناما تۋرالى" زاڭىنىڭ 6-بابىنا سايكەس، بارلىق كورنەكى اقپارات مەملەكەتتىك تىلدە جازىلۋعا ءتيىس.

ال اكىمشىلىك كودەكستىڭ 453-بابى مۇنداي بۇزۋشىلىق ءۇشىن كاسىپكەرگە 50 اەك (184 600 تەڭگە) كولەمىندە ايىپپۇل سالۋدى قاراستىرادى.

"بۇل دۇكەندە ءبىر اۋىز قازاقشا ءسوز جوق. زاڭدى ساقتاماي وتىرعاندار جاۋاپ بەرۋى ءتيىس"، – دەيدى جۋرناليست.

قوعامدىق رەاكسيا: بويكوت پەن قىسىم

كامشات تاسبولات وسى جاعدايدان كەيىن Envy بۋتيگىنە بويكوت جاريالادى. ول قازاقشا قىزمەت كورسەتەتىن باسقا دۇكەندى تاپقانىن حابارلادى. سونىمەن قاتار تىلدەردى دامىتۋ باسقارماسىن بۇل ماسەلەنى نازارعا الۋعا شاقىردى.

الايدا كوپ ۇزاماي جۋرناليست ءوز جازباسىن ءوشىرىپ تاستاعان.
"ءوشىرتتى" دەپ قىسقا عانا جازىپ قالدىرعانىمەن، ناقتى كىم نەمەسە قانداي سەبەپپەن ەكەنىن ناقتىلاماعان.

پرەزيدەنت توقايەۆ بۇعان دەيىن ازاماتتاردىڭ ءبىر-بىرىن بەلگىلى ءبىر تىلدە سويلەۋگە ماجبۇرلەۋگە بولمايتىنىن ايتقان. الايدا كەيبىر جاعدايلاردا بۇل مالىمدەمە مەملەكەتتىك تىلدە قىزمەت سۇراعان ازاماتتارعا قاتىستى تەرىس كوزقاراس تۋدىرۋعا سىلتاۋ بولىپ وتىرعانى بايقالادى. سونىڭ سالدارىنان قازاق تىلىندە سويلەگەن ادامدارعا "ۇلتشىل" دەگەن ايىپ تاعۋ نەمەسە تىلدىك قۇقىقتى مەنسىنبەۋ فاكتىلەرى قايتا جيىلەي تۇسكەنى قوعامدا الاڭداۋشىلىق تۋعىزۋدا.