9 ماۋسىم كۇنى تەرگەۋدەگى پ.قايرات پروكۋراتۋرا ورگاندارىنا ارىز ءتۇسىرىپ، مەكەمە قىزمەتكەرى كامەرا ەسىگىن كۇشتەپ جاپقان كەزدە ونى ەسىك اراسىنا قىسىپ، دەنە جاراقاتىن كەلتىرگەنىن مالىمدەگەن. استانا پوليسياسى وسىعان قاتىستى تەرگەۋ يزولياتورىنان ۆيدەو جاريالادى، دەپ حابارلايدى Qamshy.kz اقپاراتتىق اگەنتتىگى.

"اتالعان ارىز بويىنشا جيناقتالعان ماتەريالدار استانا قالاسى پوليسيا دەپارتامەنتىنە جولدانىپ، قازىرگى ۋاقىتتا سوتقا دەيىنگى تەرگەپ-تەكسەرۋ امالدارى جۇرگىزىلۋدە. تەرگەۋ اياسىندا مەكەمەنىڭ بەينەباقىلاۋ كامەرالارىنداعى جازبالار زەردەلەنىپ، قىزمەتكەرلەر مەن كۋالاردان جاۋاپ الىندى.

العاشقى تەرگەۋ ارەكەتتەرىنىڭ ناتيجەسى بويىنشا پ.قايرات مالىمدەگەندەي، كامەرا ەسىگىن جابۋ كەزىندە مەكەمە قىزمەتكەرلەرىنىڭ وعان دەنە جاراقاتىن كەلتىرۋى تۋرالى سوزدەرى راستالمايدى. بۇعان پ.قايرات ءوز ارىزىندا كورسەتكەن وقيعا ساتىندەگى بەينەباقىلاۋ جازباسى دالەل بولىپ وتىر. قازىرگى ۋاقىتتا قاجەتتى تەرگەۋ ارەكەتتەرى جۇرگىزىلىپ، ءتيىستى ساراپتاما تاعايىندالدى"، دەلىنگەن پوليسيانىڭ حابارلاماسىندا.