الماتىدا شەتەلدىكتەرگە قاراقشىلىق شابۋىل جاساعان كۇدىكتىلەر ۇستالدى، دەپ حابارلايدى Qamshy.kz اقپارات اگەنتتىگى Polisia.kz سايتىنا سىلتەمە جاساپ.

جاڭا جىل قارساڭىندا سينگاپۋر ازاماتتارىنا قاراقشىلىق شابۋىل جاسالدى.

"بەلگىسىز بەس ادام شەتەلدىكتەردىڭ جالدامالى ۇيىنە باسىپ كىرىپ، ولاردى قارۋمەن قورقىتىپ، جيعان-تەرگەندەرىن بەرۋدى تالاپ ەتكەن. قىلمىسكەرلەردىڭ “ولجاسى” 3 ميلليون تەڭگە جانە 13 مىڭ دوللاردان اسادى. شابۋىل جاساعاندار انىقتالىپ، ۇستالدى. بۇل – 1999، 2001، 2003 جىلى تۋعان الماتى وبلىسىنىڭ بەس تۇرعىنى"، - دەيدى ۆەدومستۆو.

قىلمىستىڭ نەگىزگى ۇيىمداستىرۋشىسى ت.ەسىمدى ادام، بۇرىن قاراقشىلىق شابۋىل جاساعانى ءۇشىن سوتتالعان.

"قىلمىستى ۇيىمداستىرۋشى زارداپ شەككەندەرمەن جۇمىس ىستەگەن، ولاردىڭ تابىسى تۋرالى بىلگەن. وقيعانى انىقتاۋدا بەينەباقىلاۋ جۇيەلەرى ماڭىزدى ءرول اتقاردى. ايعاقتى زاتتار، ونىڭ ىشىندە ەكى ويىنشىق تاپانشا تاركىلەندى"، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.